Reseıge salynǵan sanktsııalar otandyq bızneske qalaı áser etip jatyr – UKP

NUR-SULTAN. QazAqparat – Reseı Federatsııasyna salynyp jatqan sanktsııalardyń Qazaqstannyń bıznes salasyna qandaı áserin tıgizip jatyr. Bul týraly «Atameken» ulttyq kásipkerler palatasynyń Nur-Sultan qalasy boıynsha fılıaly dırektorynyń mindetin atqarýshy Beısen Jolboldıev aıtyp berdi, dep habarlaıdy QazAqparat tilshisi.

«Reseıge salynyp jatqan sanktsııalarǵa baılanysty ulttyq kásipkerler palatasy janynan jedel shtab qurylyp, jumys istep jatyr. Osy ýaqytqa deıin kásipkerlerden 377 bıznes máselesi boıynsha suraqtar kelip tústi. Máselelerdiń deni logıstıkamen baılanysty. ıAǵnı azyq-túlik, medıtsınalyq ónimder, qurylys materıaldaryn jetkizýge qatysty qıyndyqtar. Sonymen qatar aqsha aýdarymyna da qatysty túıtkildi jaıttar bar. Odan bólek, kóptegen kásipkerler Reseı men Belarýs shekarasynan júkterin ótkize almaı álek bolyp jatyr. Olardyń qatarynda qubyrlar, qaǵaz, temir, qurylys materıaldary jáne medıtsınalyq ónimder bar», - dedi Beısen Jolboldıev «Atameken» UKP-da onlaın ótken baspasóz máslıhatynda.

Sondaı-aq, «Atameken» UKP ókili dollardyń ósýi keıbir bıznes kelisimsharttaryna qaýip tóngizgenin aıtty.

«2021 jyly jasalǵan keıbir kelisimsharttyń oryndalmaý qaýpi bar. Sebebi kelisim byltyr dollardyń baǵasy 435 teńge kezinde jasaldy. Al qazir dollar 510 teńgege jetip otyr. Osy tusta kásipkerler kótergen ár másele jedel shtabta qaralatyn bolady», - deıdi ol.

Buǵan deıin habarlaǵanymyzdaı Reseıge salynyp jatqan sanktsııalardyń otandyq bıznestiń damýyna áserine baılanysty kásipkerlerge arnalǵan jedel shtab quryldy.