Reseıge salynǵan sanktsııanyń kesirinen KASE men AIX-tiń áleýetin biriktirý toqtap qaldy

ASTANA. KAZINFORM — Ulttyq bank tóraǵasy Tımýr Súleımenov KASE-niń reseılik aktsıoneri sanktsııaǵa tap bolǵany úshin elimizde biryńǵaı bırjalyq holdıng qurý isi turalap qalǵanyn aıtty.

«KASE men „Astana“ halyqaralyq qarjy ortalyǵyndaǵy AIX bırjasynyń áleýetterin biriktirý týraly aıtsaq, sebebin jaqsy bilesizder. Aktsıonerlerdiń biri MOEX (Máskeý bırjasy) sanktsııaǵa ilindi. Sáıkesinshe, biryńǵaı bırjalyq holdıng qurý is júzinde júzege aspaıtyn bolyp tur. Sondyqtan qazirgi ahýal turǵanda „toqta“ degen máselege kelip turmyz. Tóte suraqqa tóte jaýap osyndaı. Ázirge bul isti aıaqtaı almaımyz, tipti oılaı da almaımyz. Óıtkeni KASE-niń quramynda sanktsııaǵa túsken aktsıoner bar», — dedi ol kezekti baspasóz máslıhatynda.

Sondaı-aq, ol Máskeý bırjasymen aradaǵy máseleni KASE-niń ózi sheshý kerektigin aıtty.

«Qazir Máskeý bırjasyna tıesili aktsııalardy KASE-niń ózine qaıta satyp alý týraly áńgimeler júrip jatyr. Árıne, olar atalǵan úlesti ózderine qaıta satyp alǵysy keledi. Óıtkeni sanktsııanyń áseri ózderine tımegenin qalaıdy. Biz — KASE-niń eń iri aktsıonerleriniń birimiz. Biraq bizden basqa aktsıonerleri de jeterlik. Sondyqtan naqty sheshimniń naqty tetikterin KASE-niń ózine suraý kerek», — dedi Tımýr Súleımenov.