Reseıge salynǵan sanktsııalar Qazaqstannyń bıdaı eksportyna qalaı áser etedi
ASTANA. KAZINFORM – Premer-mınıstrdiń orynbasary Serik Jumanǵarın Reseıge salynǵan sońǵy sanktsııalar Qazaqstannyń astyq eksportyna keri áser ete me dep alańdaıtynyn aıtty.
«Shyn máninde bul bizdi óte qatty janap ótip jatyr. Munyń kesirinen kóptegen logıstıkalyq, saýda tizbekteri úzilip qaldy. Biz sanktsııa salýshy koalıtsııanyń múshesi emespiz jáne osy birjaqty sanktsııalyq saıasatty qoldamaımyz. Biraq ol sanktsııany saqtaımyz. Óıtkeni ol bizge ekonomıkalyq turǵydan tıimdi. Bizdiń ekonomıkamyz sonshalyq úlken emes. Sáıkesinshe sanktsııa tússe, qysymyn kótere almaımyz. Bizdiń kásiporyndar birinshi kezekte kótere almaıdy. Sondyqtan biz únemi dıalog quryp kelemiz. AQSh-pen, Eýropalyq odaqpen jumys isteıtin ókildikter bar. Men osy jumysty Qazaqstannyń ishinde vıtse-premer retinde basqaramyn», - dedi ol Májilistiń jalpy otyrysynan keıin BAQ ókilderine bergen suhbatynda.
Vıtse-premer Reseı astyǵyna qoıylǵan shekteýlerdiń Qazaqstanǵa áseri zerdelenip jatqanyn aıtady.
«Sanktsııa saıasaty áser etetin salalar sońǵy qabyldanǵan paketterde kórinis tapqan. Aıtarlyqtaı alýan túrli deýge bolady. Ázirge ol sanktsııalar naqty azyq-túlik ónimderin qamtyǵan joq. Biraq Eýroodaq Reseı men Belarýs bıdaıyna eksport bajyn salǵanyn bilesizder. Bul aıtarlyqtaı salmaqty argýment. ıAǵnı, osy shekteýler qandaı da bir jolmen bizdi de janap ketpeı me, sony anyqtap alý qajet. Óıtkeni biz Eýroodaqqa aıtarlyqtaı kóp bıdaı eksporttaımyz», - dedi Serik Jumanǵarın.
