Reseıge óte almaı qalǵan 160-qa jýyq júk kóligi «Jaısan» beketinde tur
ASTANA. KAZINFORM — Aqtóbe oblysyndaǵy «Jaısan» avtokólik ótkizý pýnktinde Reseıge baǵyt alǵan 160-qa jýyq júk kóligi jınaldy. Bul týraly Memlekettik kirister komıteti habarlady.
Komıtettiń málimetinshe, kólikterdiń jınalýyna Reseıdiń «Sagarchın» ótkizý pýnktindegi jóndeý jumystary sebep bolǵan. Reseı tarapy 4 qyrkúıekten bastap jol tósemin aýystyryp jatyr. Osyǵan baılanysty kólik qozǵalysy bir jolaq boıynsha keri rejımde uıymdastyrylǵan.
Bul óz kezeginde ótkizý pýnktiniń ótkizý qabiletin tómendetip, shekaradan kólikterdiń ótý jyldamdyǵyna áser etip otyr.
Memlekettik kirister komıteti múddeli memlekettik organdarmen birlesip, «Jaısan» beketiniń úzdiksiz jumysyn qamtamasyz etý jáne Reseı tarapynyń qabyldaý múmkindigin eskere otyryp, kólik qozǵalysyn jedeldetý sharalaryn qabyldap jatyr.
— Osy maqsatta ótkizý pýnktindegi jumys kúsheıtildi, kólik aǵyndaryn retteý jáne olardy jaqyn mańdaǵy ótkizý pýnktterine ishinara qaıta bólý uıymdastyryldy, aǵymdaǵy ótkizý qabiletin eskere otyryp, elektrondyq kezektegi slottardyń sany túzetildi, — delingen habarlamada.
Júrgizýshilerge ótkizý pýnktiniń aldynda jaǵdaıǵa baılanysty túsindirý jumystary júrgizilip jatyr.
Qazirgi jaǵdaı memlekettik organdardyń baqylaýynda. Komıtet tasymaldaýshylardan marshrýttardy josparlaý kezinde shekaradaǵy ahýaldy eskerýdi surady.
Eske salaıyq, buǵan deıin «Almaty — Bishkek» jolynda júk kólikteriniń qozǵalysyna ýaqytsha shekteý engiziletinin habarlaǵanbyz.
