Reseıge quıǵan ınvestıtsııa 6 mlrd dollarǵa jýyqtady – Prezıdent suhbatynan

Búginde Qazaqstan men Reseı arasynda jalpy somasy 3,2 mıllıard dollar bolatyn 30 mańyzdy joba júzege asyp jatyr. Odan bólek, eki eldiń bıznes sýbektileri jalpy somasy 33,5 mıllıard dollar bolatyn 143 birlesken jobany qolǵa aldy. Bul týraly QR Prezıdenti Qasym-Jomart Toqaevtyń reseılik «Izvestııa» gazetine bergen suhbatta aıtyldy, dep habarlaıdy Kazinform.

«Investıtsııalyq yntymaqtastyq týraly saýalyńyzǵa oraı myna nárseni aıtqym keledi. Sońǵy 18 jylda Reseıden Qazaqstanǵa kelgen tikeleı ınvestıtsııanyń jalpy kólemi 20 mıllıard dollardan asty. Óz kezeginde, Qazaqstannyń Reseıge quıǵan ınvestıtsııasy 6 mıllıard dollarǵa jýyqtady. Investıtsııalyq yqpaldastyqtyń osylaısha oń qarqyn alýyna óndiristik kooperatsııanyń da septigi tıdi», - dep jaýap berdi Memleket basshysy suhbat saýalyna.

Qasym-Jomart Toqaev túsindirgendeı eki eldiń bıznes sýbektileri jalpy somasy 33,5 mıllıard dollar bolatyn 143 birlesken jobany júzege asyryp jatyr.

«Jalpy somasy 3,2 mıllıard dollar bolatyn 30 mańyzdy joba sátti iske qosyldy. Qazirgi kezde mashına jasaý, metallýrgııa jáne hımııa ónerkásibi sekildi ekonomıkanyń mańyzdy salalarynda 40 joba júzege asyrylýda. Olardyń jalpy quny 16,6 mıllıard dollardy quraıdy ári 15 myńnan astam adamdy jumyspen qamtıdy. Bir sózben aıtqanda, Qazaqstan-Reseı yntymaqtastyǵyn damytý úshin bul baǵytta mol áleýet bar», - dep tolyqtyrdy Prezıdent.