Reseıge qarsy sanktsııalardyń yqpal deńgeıin anyqtaıtyn is-qımyl jospary ázirlenedi - QR UEM
ASTANA. QazAqparat - Reseıge qarsy amerıkalyq sanktsııalardyń yqpal deńgeıin anyqtaý úshin QR Úkimeti men Ulttyq banktiń is-qımyl jospary ázirlenedi. Bul týraly QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat.
Májiliste «2018-2020 jyldarǵa arnalǵan respýblıkalyq bıýdjetti naqtylaý týraly» QR zańynyń jobasyn talqylaý barysynda depýtat Albert Raý mınıstrden AQSh-tyń Reseıge qatysty sanktsııalarynyń elimizdiń ekonomıkasyna áserin suraǵan bolatyn.
«Biz Qazaqstan ekonomıkasyna yqpal etetin túrli saýda, ınvestıtsııalyq, baǵamdyq arnalardy qarastyrdyq. Qazirgi ýaqytta eń úlken arna - bul baǵam bolyp otyr. ıAǵnı, teńge men rýbl baǵamynyń belgili bir baılanysy bar. Búgin Ulttyq bankpen bul máseleni jan-jaqty talqyladyq», - dep atap ótti mınıstr.
Onyń aıtýynsha, Reseıge qatysty amerıkalyq sanktsııalardyń Qazaqstan ekonomıkasyna tikeleı yqpal etetindeı qandaı da bir faktorlar joq.
«Soǵan baılanysty ahýaldyń odan ary qaraı damıtyndyǵyn kelesi saýda sessııasynyń ishinde baqylap kórý usynylady. Degenmen, qalaı bolǵanda da biz aptanyń sońyna deıin sanktsııalardyń yqpal deńgeıin anyqtaý jónindegi Úkimet pen Ulttyq banktiń birlesken is-qımyl josparyn jáne olar bizge teris áser ete bastaǵan jaǵdaıda ony sheshý joldaryn jasaıtyn bolamyz», - dedi Tımýr Súleımenov.
