Reseıge elektr energııasyn eksporttap jatyrmyz – Energetıka mınıstri
ASTANA. KAZINFORM – 2027 jyly elimizde 1,5 mlrd kVt·saǵat elektr energııasy profıtsıti bolady. Bul týraly búgin Úkimet otyrysynan keıingi baspasóz máslıhatynda Energetıka mınıstri Erlan Aqkenjenov aıtty.
- Jylý elektr ortalyqtaryndaǵy apat deńgeıin tómendetý jáne jumysyn jaqsartý baǵytynda aýqymdy jumystar atqaryldy. Iá, elektr energııasyna eń joǵary júkteme 18 200 MVt bolady dep boljanyp otyr. Qazirgi ýaqytta elektr stantsııalarymyz shtattyq rejımde jumys istep tur. Máselen, eki kún qatarynan Reseıge elektr energııasyn eksporttap jatyrmyz. Aldyńǵy kúni Reseıge 120 MVt, keshe qatelespesem, shamamen 70–80 MVt elektr energııasy jóneltildi, - dedi mınıstr BAQ ókilderiniń saýalyna oraı.
Onyń paıymynsha, bul qazirgi ýaqytta elektr stantsııalarymyz tipti eń joǵary júkteme kezinde, ıaǵnı keshki tutyný sheginde de ishki suranysty qamtamasyz ete alatynyn kórsetedi.
- Demek, Qazaqstan elektr energııasyna degen ishki qajettiligin tolyq qamtamasyz etýge jaqyndap keledi. Keler jyly elimizde 1,5 mlrd kVt·saǵat elektr energııasy profıtsıti bolady dep josparlanyp otyr, - dedi Erlan Aqkenjenov.
Buǵan deıin Energetıka mınıstri qysta elektr energııasyn tutyný 18,2 myń MVt-qa jetýi múmkin ekenin aıtan bolatyn.
