Reseıge 86 tonna benzındi zańsyz alyp ótpek bolǵandar ustaldy - UQK
ASTANA. QazAqparat - Qazaq-Reseı shekarasynda qazaqstandyq shekarashylar 86 tonna benzındi zańsyz ótkizbek bolǵandardyń jolyn kesti, dep habarlady QR UQK Shekara qyzmetinen.
Shekara qyzmetiniń «Shyǵys» óńirlik basqarmasynyń «Semeı» jeke ótkizý-baqylaý bólimine qarasty «Qoıanbaı» (avtomobıldi) beketiniń baqylaýshylary «MAZ» jáne «IVEKO» avtomashınalaryn tekserý kezinde jalpy salmaǵy 86 tonna bolatyn benzındi (AI-80) shekaradan zańsyz ótkizýge tyrysqan reseılik jáne qazaqstandyq azamattardy ustady.
«Pavlodar - Barnaýl» (RF) baǵytynda tirkemelerin tirkep jolǵa shyqqan sybaılastardyń júkke baılanysty kórsetken qujattary jaramsyz bolyp tanyldy. «Oqıǵa bolǵan jerge Shyǵys Qazaqstan oblysy Besqaraǵaı aýdandyq ishki ister bóliminen jedel-tergeý toby kelip, Qylmystyq kodekstiń 183-1 babyna sáıkes, shekarashylar anyqtaǵan materıal polıtsııa qyzmetkerlerine berildi. Tergeý jumystary júrgizilýde», delingen habarlamada.
