Reseıge 480 tonna benzındi zańsyz shyǵarmaq bolǵandar ustaldy

PAVLODAR. QazAqparat - Pavlodar oblysynda 480 tonnadan astam janar-jaǵarmaıdy «eritkish» retinde syrtqa shyǵarmaq bolǵan oqıǵanyń jolyn kesti, dep habarlaıdy QazAqparat Qarjylyq monıtorıng agenttigine silteme jasap.

Munaı salasy el ekonomıkasynyń basym bóligin quraıdy.

Osy saladaǵy kóleńkeli aınalym neǵurlym kóp bolsa, memleket bıýdjetine soǵurlym az qarajat túsedi.

Qarjylyq monıtorıng agenttigi munaı men munaı ónimderiniń zańsyz aınalymyna qarsy kúres júrgizýde.

Agenttiktiń Pavlodar oblysy boıynsha aýmaqtyq departamenti Qazaqstannan Reseı Federatsııasyna 480 tonnadan astam AI-92 markaly benzındi zańsyz tasymaldaý dereginiń jolyn kesti.

Tergeý barysynda JJM-dy «eritkish» túrinde temirjol tsısternalary arqyly tasymaldaý josparlaǵany anyqtaldy.

Benzındi satý kelisimshartynyń jalpy somasy 2,8 mlrd teńgeni quraıdy.

Atalǵan derek boıynsha sotqa deıingi tergep-tekserý amaldary júrgizilýde.