Reseıdiń jaldaýynan shyǵarylǵan nysandar Baıqońyrdyń týrıstik baǵyttaryna qosyldy
QYZYLORDA. KAZINFORM — Baıqońyrda keıingi jyldary jańa týrıstik baǵyttar paıda boldy.
Qyzylorda oblysy ákiminiń orynbasary, QR Prezıdentiniń «Baıqońyr» keshenindegi arnaýly ókili Qaırat Nurtaı málimdegendeı, qaladaǵy týrıstik áleýeti joǵary birqatar nysan reseılik taraptyń jaldaýynan shyǵarylyp, jańa baǵyttarǵa qosyldy.
— Olardyń qatarynda «Gagarın starty», «Gagarın besedkasy», dınamıkalyq synaq stendi jáne «Energııa-Býran» montajdaý-otyn quıý kesheni bar. 2024 jyldyń jeltoqsan aıynda ǵarysh aılaǵynda alǵash ret ulttyq naqyshta kıiz úı úlgisinde salynǵan qazaqstandyq zamanaýı baqylaý pýnkti paıdalanýǵa berildi. Týrıstik qyzmetti uıymdastyratyn «Infrakos» kásiporny 30-dan astam týroperatormen yntymaqtastyq ornatqan, — dedi ol.
Óńirlik týrızmdi damytý baǵytynda oblys mektepteriniń oqýshylary, joǵary oqý oryndarynyń stýdentteri jáne oblystyq aqsaqaldar keńesiniń músheleri úshin ǵarysh kemeleriniń ushyrylymyn tamashalaýǵa arnalǵan týrıstik saparlar turaqty túrde uıymdastyrylyp keledi.
Buǵan deıin Premer-Mınıstrdiń tapsyrmasymen Baıqońyr kesheninde týrızmdi damytýdyń 2030 jylǵa deıingi tujyrymdamasy bekitildi.
