Reseıdiń ıAroslavl oblysynda aza tutý kúni jarııalandy
ASTANA. KAZINFORM — Reseıdiń ıAroslavl oblysynda pırotehnıka óndiretin kásiporynda bolǵan órtten taǵy bir adamnyń kóz jumǵany belgili boldy. Al 15 adam tilsiz jaýdan zardap shekken. Aımaqta 30 qyrkúıek — aza tutý kúni dep jarııalandy.
TASS agenttiginiń málimetinshe, Pereslavl-Zalesskıı okrýginiń Kýbrınsk aýylyndaǵy órt tolyq sóndirildi. Qazir qutqarýshylar oqıǵa ornynda úıindilerdi ashý jumystaryn jalǵastyryp jatyr.
Buǵan deıin órtke baılanysty okrýgte tótenshe jaǵdaı rejımi engizilgen bolatyn. Oqıǵa ornynda jedel shtab qurylyp, onyń jumysyna ıAroslavl oblysynyń úkimeti, Tergeý komıteti, polıtsııa jáne Tótenshe jaǵdaılar mınıstrliginiń ókilderi qatysyp jatyr.
30 qyrkúıek ıAroslavl oblysynda aza tutý kúni retinde jarııalandy. Memlekettik organdardyń ǵımarattarynda memlekettik tý tómen túsiriledi. Telearnalarǵa, radıostantsııalarǵa jáne mádenıet mekemelerine oıyn-saýyq baǵdarlamalary men is-sharalardy toqtatý usynyldy.
Óńir bıligi qaza bolǵandardyń otbasylaryna jáne zardap shekkenderge qarjylaı, medıtsınalyq jáne psıhologııalyq kómek kórsetiletinin málimdedi.
— Jaǵdaıdy jeke baqylaýymda ustap otyrmyn. Qaıǵyly oqıǵanyń sebepterin mindetti túrde anyqtap, kinálilerdi jaýapqa tartamyz, — dedi ıAroslavl oblysynyń gýbernatory Mıhaıl Evraev.
Reseı Tergeý komıteti ónerkásiptik qaýipsizdik talaptaryn buzý faktisi boıynsha qylmystyq is qozǵady. Tergeýshiler órttiń shyǵý sebepteri men oqıǵanyń mán-jaıyn anyqtap jatyr.
Buǵan deıin pırotehnıka óndiretin kásiporynda bolǵan tótenshe jaǵdaı saldarynan jaqyn mańdaǵy 9 kópqabatty turǵyn úıdiń zaqymdanǵany habarlanǵan bolatyn. Sonymen qatar turǵyndardy ýaqytsha ornalastyrý úshin arnaıy pýnktter ashyldy.
