Reseıdiń Saratov oblysy Qazaqstan óńirlerimen yntymaqtastyqty keńeıtýge múddeli
MÁSKEÝ. KAZINFORM — Reseıdiń Saratov oblysy Qazaqstan óńirlerimen saýda-ekonomıkalyq jáne gýmanıtarlyq yntymaqtastyqty odan ári damytýǵa qyzyǵýshylyq tanytyp otyr, dep habarlaıdy agenttik tilshisi.
Qazaqstannyń Qazan qalasyndaǵy Bas konsýly Erlan Ysqaqov, Saratov oblysynyń ekonomıkalyq damý mınıstri Andreı Razborov jáne óńirlik Saýda-ónerkásip palatasynyń tóraǵasy Ilıa Býtko kezdesý barysynda osy máselelerdi talqylady.
Kezdesý barysynda taraptar Qazaqstan men Reseı arasyndaǵy óńiraralyq ózara is-qımyldyń turaqty damyp kele jatqanyn atap ótti. Bul seriktestiktiń negizinde eki eldiń ortaq shekarasy men tyǵyz ekonomıkalyq baılanystary jatyr. Ártúrli salalardaǵy yntymaqtastyqty nyǵaıtý maqsatynda iskerlik mıssııalar, forýmdar jáne mádenı-gýmanıtarlyq is-sharalar turaqty túrde ótkizilip keledi.
Erlan Ysqaqov suhbattastaryna Qazaqstanda júzege asyrylyp jatqan saıası jáne áleýmettik-ekonomıkalyq reformalar, sondaı-aq 2026 jyly elde ótetin halyqaralyq forýmdar týraly aqparat berdi.
Kezdesýde saýda-ekonomıkalyq yntymaqtastyqty damytý máselesine erekshe nazar aýdaryldy. Ótken jyldyń qorytyndysy boıynsha Saratov oblysy men Qazaqstan arasyndaǵy taýar aınalymy 15 paıyzǵa artqan. Qazirgi ýaqytta óńir aýmaǵynda qazaqstandyq kapıtaldyń qatysýymen qurylǵan 27 birlesken kásiporyn jumys isteıdi.
Sonymen qatar Qazaqstannyń Bas konsýldyǵy Saratov qalasynda Qazaqstan Respýblıkasynyń Qurmetti konsýlynyń keńsesin ashýdy josparlap otyr. Bul bastama óńiraralyq baılanystardy jandandyryp, iskerlik áriptestikti keńeıtýge yqpal etedi dep kútiledi.
Saratov oblysynyń ekonomıkalyq damý mınıstri Andreı Razborov mundaı kezdesýlerdiń praktıkalyq yntymaqtastyqty damytýdaǵy mańyzyn atap ótti.
— Mundaı saparlar óńiraralyq ózara is-qımyldyń mańyzdy bóligi sanalady jáne tájirıbe almasyp qana qoımaı, birlesken jobalardy iske asyrý boıynsha naqty qadamdardy aıqyndaýǵa múmkindik beredi, — dedi ol.
Mınıstrdiń aıtýynsha, Qazaqstan Saratov oblysynyń eksport kólemi boıynsha syrtqy saýda seriktesteri arasynda ekinshi orynda tur. Óńir sondaı-aq bilim berý salasyndaǵy yntymaqtastyqty jalǵastyrýǵa múddeli. Qazir Saratov oblysynda Qazaqstannan kelgen 300-den astam stýdent bilim alyp jatyr.
Sapar aıasynda qazaqstandyq delegatsııa Saratov oblysyndaǵy ónerkásiptik, mádenı jáne áleýmettik mańyzy bar nysandardy aralady.
Budan buryn Qazaqstan soltústik óńirlerdi gazdandyrý úshin Reseımen kelissóz júrgizip jatqanyn jazǵanbyz.
