Reseıdiń Rıazan zaýytyndaǵy órtten qaza tapqandar sany 25-ke jetti

ASTANA. KAZINFORM — Jedel-qutqarý jumystary barysynda Rıazan oblysyndaǵy zaýytta órt saldarynan qaza tapqan taǵy bir adamnyń máıiti tabyldy. Bul týraly RF TJM baspasóz qyzmeti habar taratty.

Jańartylǵan aqparat boıynsha 158 adam zardap shekti, onyń 25-i qaıtys boldy.

Aıta keteıik, 15 tamyz kúni Rıazan oblysynyń Shılovskıı aýdanyndaǵy sıntetıkalyq talshyq shyǵaratyn «Elastık» zaýytynyń óndiristik tsehtarynyń birinde órt shyǵyp, sonyń saldarynan jarylys bolǵan.

Rıazan oblysynyń gýbernatory Pavel Malkovtyń buıryǵymen 15 tamyzda saǵat 19:00–den bastap Shılovskıı mýnıtsıpaldy okrýginiń aýmaǵynda kelesi eskertýge deıin tótenshe jaǵdaı jarııalandy.

Órt faktisi boıynsha Reseı Federatsııasy Qylmystyq kodeksiniń 217-babynyń 3-bóligi (baıqaýsyzda eki nemese odan da kóp adamnyń ólimine ákep soqtyrǵan qaýipti óndiristik obektilerge arnalǵan ónerkásiptik qaýipsizdik talaptaryn buzý) boıynsha qylmystyq is qozǵaldy.

Rıazan oblysynyń gýbernatory qaıǵyly oqıǵada qaza tapqandardyń otbasylaryna 1 mıllıon 567 myń rýblden, al zardap shekkenderge 627 myń rýblge deıin ótemaqy tólenetinin habarlady.

18 tamyz Rıazan oblysynda qaza tapqandardy aza tutý kúni bolyp jarııalandy.

Aıta keteıik, keshe Rıazan oblysynyń Shılov aýdanyndaǵy kásiporynda bolǵan jarylys saldarynan qaza tapqandardyń sany 23 adamǵa óskenin jazǵan edik.