Reseıdiń OSK Memlekettik Dýma saılaýynyń qorytyndysyn jarııalady
MÁSKEÝ. KAZINFORM — Reseıdiń Ortalyq saılaý komıssııasy Memlekettik Dýmanyń toǵyzynshy shaqyrylymy depýtattaryn saılaýdyń qorytyndysyn bekitti. Bul týraly OSK tóraıymy Ella Pamfılova komıssııa otyrysynda málimdedi, dep habarlaıdy agenttik tilshisi.
Daýys berý qorytyndysy boıynsha «Edınaıa Rossııa» partııasy 349 mandatqa, KPRF — 37, LDPR — 23, «Novye lıýdı» — 19, «Spravedlıvaıa Rossııa» — 17, «Rodına» bir mandatqa ıe boldy. Taǵy tórt mandatty ózin-ózi usynǵan kandıdattar aldy.
Paıyzdyq kórsetkish boıynsha «Edınaıa Rossııa» 58,21%, KPRF — 13,47%, LDPR — 8,88%, «Novye lıýdı» — 7,82%, «Spravedlıvaıa Rossııa» — 5,34% daýys jınady. Birmandatty okrýgter boıynsha «Edınaıa Rossııa» 209 mandat aldy.
Saılaýshylardyń qorytyndy belsendiligi 59,8%-dy qurady. Daýys berýge shamamen 67,4 mln saılaýshy qatysty.
Ella Pamfılova jaramsyz bıýlletender sany týraly da habarlady. Reseıdegi saılaý barysynda 37 myńǵa jýyq bıýlleten jaramsyz dep tanyldy. Bul jalpy bıýlletender sanynyń 1,36%-yn quraıdy.
Onyń aıtýynsha, mundaı bıýlletender Reseıdiń 12 óńirindegi 20 saılaý ýchaskesinde anyqtalǵan. Sheteldegi 333 saılaý ýchaskesinde 6,9 myńnan astam bıýlleten jaramsyz dep tanyldy. Bul daýys berý jáshikterinen alynǵan bıýlletenderdiń jalpy sanynyń 2,5%-ynan az.
Eske salaıyq, buǵan deıin Reseıde Memlekettik dýma saılaýynda úsh kúndik daýys berý bastalǵanyn jazǵanbyz.
Qazaqstan Prezıdenti Qasym-Jomart Toqaev Vladımıp Pýtındi Memlekettik Dýma saılaýynyń ótýimen quttyqtady.
