Reseıdiń Ortalyq óńirlerinde jeńil ushaqtar men drondardyń ushýyna shekteý engiziledi
MÁSKEÝ. KAZINFORM – Bıylǵy 20 maýsymnan bastap Reseıdiń birqatar ortalyq óńirinde jeńil jáne asa jeńil áýe kemeleri men azamattyq ushqyshsyz ushý apparattarynyń áýe keńistigin paıdalanýyna ýaqytsha shekteýler engiziledi, dep habarlaıdy agenttik Reseıdiń Áýe kóligi jónindegi federaldyq agenttiginiń (Rosavıatsııa) baspasóz qyzmetine silteme jasap.
Shekteýler Máskeý qalasy, Máskeý oblysynyń basym bóligi, sondaı-aq Rıazan, Týla, Kalýga, Tver, ıAroslavl jáne Vladımır oblystarynyń jekelegen aýdandary aýmaǵynda qoldanylady.
Vedomstvonyń málimetinshe, Reseı Qorǵanys mınıstrliginiń usynysy negizinde Áýe qozǵalysyn uıymdastyrýdyń biryńǵaı júıesiniń Bas ortalyǵy áýe keńistigin paıdalanýdyń ýaqytsha tártibin engizdi. Ol jer betinen 5200 metr bıiktikke deıingi aralyqtaǵy ushýlarǵa qatysty bolady.
Sonymen qatar bul shekteýler memlekettik jáne eksperımenttik avıatsııanyń áýe kemelerine qoldanylmaıdy.
– Ýaqytsha rejım 2026 jylǵy 20 maýsymnan bastap arnaıy habarlama jarııalanǵanǵa deıin kúshinde bolady, – delingen Rosavıatsııa habarlamasynda.
Vedomstvo atalǵan sharalar ushý qaýipsizdigin qamtamasyz etý maqsatynda qabyldanǵanyn atap ótti. Máskeý avıatsııalyq toraby men Reseıdiń basqa óńirlerindegi áýejaılar arqyly turaqty jáne charterlik reıster burynǵy keste boıynsha oryndala beredi.
Jeńil jáne asa jeńil áýe kemeleri negizinen jeke maqsattaǵy, oqý-jattyǵý, sporttyq jáne aýyl sharýashylyǵy jumystaryna arnalǵan shaǵyn ushý apparattary sanatyna kiredi. Asa jeńil áýe kemelerine motodeltaplandar, motoparaplandar jáne ýltrajeńil ushaqtardyń jekelegen túrleri jatady. Al jeńil sanatqa jeke avıatsııada paıdalanylatyn shaǵyn bir qozǵaltqyshty jáne eki qozǵaltqyshty ushaqtar kiredi.
Reseıdiń Áýe kodeksine sáıkes, ushý massasy 5,7 tonnaǵa deıingi apparattar jeńil áýe kemeleri sanatyna, al massasy 495 kılogramnan aspaıtyn apparattar asa jeńil áýe kemeleri sanatyna jatady.
Aıta keteıik, buǵan deıin Japonııanyń dron qoldanýǵa qatysty erejelerdi qatańdatqanyn habarladyq.
