Reseıdiń Orynbor qalasynda bir kúnde taǵy 800 úı men 1800 ýchaskeni sý basty
ASTANA. KAZINFORM – Orynbor qalasynda sońǵy táýlikte taǵy 800 úı men 1,8 myń sharýashylyq ýchaskesin sý basty. Qalada barlyǵy 3 myń úı men 8 myń sharýashylyq jer sý astynda qaldy, dep habarlaıdy TASS aqparat agenttigi.
Bul týraly tilshilerge qalalyq dıspetcherlik ortalyqtyń dırektory Aleksandr Sısa aıtty.
«Bir kúnniń ishinde 1800-ge jýyq úı irgesindegi jer men 800-ge jýyq úıdi sý basty, barlyǵy 8 myńǵa jýyq sharýashylyq telimi men 3 myńǵa jýyq úı bar», - dedi ol.
Dongýzskaıa jáne Ýralskaıa kóshelerin sý basýyna baılanysty turǵyndardy evakýatsııalaýǵa jol polıtsııasy men tótenshe jaǵdaılar qyzmetiniń kólikteri jiberilgen. «Grand Park» turǵyn úı keshenin de sý basyp, Potehın men Ýralskaıa kósheleriniń boıynda sý kópqabatty úılerge jaqyndady. Taǵy 55 adam evakýatsııalandy, onyń 183-i ýaqytsha ornalastyrý pýnkterine jetkizildi.
Agenttik málimetinshe, Orynbordyń Jaıyq ózeni bóligindegi sý Belıaevskaıa kóshesine jetken, ondaǵy ótkel jabylǵan. Bul kósheniń aýmaǵynda qoımalar men dúkenderdi sý basyp, jeke sektorǵa jetken. Sondaı-aq Belıaevskaıa kóshesi aýdanyndaǵy «Medık» baý-baqsha seriktestigi sý astynda qaldy. Baý-baqsha seriktestigi men Belıaevskaıa kósheleriniń arasyndaǵy bos aýmaqty sý basty. Orynbordyń bul bóligine ortalyqtan jáne basqa da shaǵyn aýdandarǵa endi tek Orynbor aýdany aýmaǵymen ótetin aınalma joldyń boıymen ǵana jetýge bolady.
Aımaq basshylyǵy baspasóz qyzmetiniń habarlaýynsha, 13 sáýirdegi jaǵdaı boıynsha 25 baý-baqsha seriktestigi, Zarechnyı, «Grand Park» shaǵyn aýdandarynda, Kýznechnyı, Kýıbyshev, «Dýbkı» turǵyn úı kesheni gazdan ajyratylǵan. 64 baý-baqsha seriktestigi, Kýznechnyı shaǵyn aýdany, taǵy birqatar kentter men shaǵyn aýdan, kósheler jaryqsyz qaldy. Jabdyqtardy sý basqandyqtan, Shafeev kóshedegi «Orentrıkotaj» qazandyǵy sóndirildi.
Eske sala ketsek, Orynbor oblysynda tasqyn sý Jaıyq ózenimen tómen qaraı aǵyp, birqatar eldi mekendi, onyń ishinde Qazaqstandy da sý basý qaýpi tónip tur.
