Reseıdiń Lenıngrad oblysynyń gýbernatory Toqaevqa Pýtınniń sálemin jetkizdi
ASTANA. KAZINFORM — Memleket basshysy Reseıdiń Lenıngrad oblysynyń gýbernatory Aleksandr Drozdenkony qabyldady.
Kezdesý barysynda Qazaqstan men Reseıdiń strategııalyq seriktestigin damytýda óńiraralyq yqpaldastyqtyń mańyzdy ról atqaratyny atap ótildi.
Qasym-Jomart Toqaev Lenıngrad oblysynyń ónerkásip jáne kólik-logıstıka salalaryndaǵy aıtarlyqtaı áleýetine toqtalyp, Qazaqstan atalǵan aımaqpen tıimdi yntymaqtastyq aıasyn keńeıtýge daıyn ekenin rastady.
Prezıdenttiń aıtýynsha, Lenıngrad oblysymen saýda-ekonomıkalyq qarym-qatynastar qarqyndy damyp keledi. Byltyr ózara taýar aınalymy 400 mıllıon dollardan asqan.
Aleksandr Drozdenko qonaqjaılyq tanytqany úshin Memleket basshysyna alǵys aıtyp, Reseı Prezıdenti Vladımır Pýtınniń sálemin jetkizdi.
Gýbernator Uly Otan soǵysy jyldarynda Lenıngrad úshin shaıqasqan qazaqstandyqtardyń batyrlyǵy men qaharmandyǵyn erekshe atap ótti. Sonymen qatar olardyń erligi týraly estelikter kózdiń qarashyǵyndaı saqtalatynyna nazar aýdardy.
Áńgimelesý barysynda ónerkásip, atom energetıkasy, kólik jáne agroónerkásip kesheni salalarynda birlesken jobalardy júzege asyrý perspektıvasy, sondaı-aq mádenı-gýmanıtarlyq baǵyttaǵy yntymaqtastyqty tereńdetý múmkindikteri talqylandy.
