Reseıdiń qurylys salasynda qaǵaz qujat qoldanylmaıtyn bolady
MÁSKEÝ.KAZINFORM - 2027 jyldan bastap elde qurylys qujattamasyn, atap aıtqanda, jobalyq qujattamany, smetalardy jáne saraptama qorytyndylaryn qaǵaz júzinde qabyldaýdy toqtatýy múmkin. Bul týraly vıtse-premer Marat Hýsnýllın málimdedi, dep habarlaıdy agenttik tilshisi «RIA Novostı»-ge silteme jasap.
Ol bılik ókilderi tsıfrlandyrýdy jyldamdatý jáne eńbek ónimdiligin arttyrý maqsatynda qurylys salasyn tolyǵymen elektrondy formatqa kóshirýge daıyn ekenin atap ótti.
Vıtse-premerdiń sózinshe, barlyq qujattama tek elektrondy túrde jasalatyn bolady. Bul barlyǵyn baǵdarlamalyq ónimderge kóshýge jáne tehnologııalarǵa ınvestıtsııa salýǵa májbúr etedi. Ol mundaı kóshýdi naryq úshin qatań shara dep moıyndady, biraq ony qajetti dep sanaıdy. Bılik tsıfrlandyrý salanyń basty máseleleriniń biri – kadr tapshylyǵyn sheshýge kómektesedi degen úmitte.
Sondaı-aq ol sońǵy alty jylda Reseıdegi qurylys jumystarynyń kólemi 34%-ǵa óskenin túsindirdi. Burynǵy ónimdilikti saqtaıtyn bolsa, salaǵa jumysshylar sanyn qazirgi 7 mıllıonnan 10 mıllıon adamǵa deıin arttyrýǵa týra keler edi.
Úkimet 2030 jylǵa qaraı qurylystaǵy eńbek ónimdiligin 22%-ǵa arttyrýdy kózdep otyr. Ol úshin tsıfrlyq servıster men jasandy ıntellektini damytý, qurylys merzimderin qysqartý, robottar men shaǵyn mehanızatsııany belsendirek engizý, sondaı-aq qurylys bilimin jańǵyrtý josparlanyp otyr.
Ol sondaı-aq kompanııalardyń tehnologııalyq jańarýy úshin turaqty tabystylyq qajet ekenin atap ótti. Tehnıka men avtomattandyrýǵa ınvestıtsııasyz salanyń tıimdiligin arttyrý múmkin emes.
Budan buryn Qazaqstan men Reseı Syrtqy ister mınıstrlikteri yntymaqtastyq boıynsha is-sharalar josparyn bekitkeni týraly jazdyq.
