Astanada Ay Yola toby men Reseıdiń tanymal mádenıet salasynyń ókilderi óner kórsetti
ASTANA. KAZINFORM - Astanada Reseı Federatsııasynyń Qazaqstandaǵy mádenıet kúnderiniń ashylý saltanatynda aýqymdy gala-kontsert uıymdastyryldy, dep habarlaıdy QR Mádenıet jáne aqparat mınıstrliginiń baspasóz qyzmeti.
Іs-sharaǵa QR Memlekettik keńesshisi Erlan Qarın, QR Premer-Mınıstriniń orynbasary – Mádenıet jáne aqparat mınıstri Aıda Balaeva, Reseı Federatsııasy Mádenıet mınıstriniń orynbasary Andreı Malyshev, sondaı-aq eki eldiń dıplomatııalyq korpýsy men shyǵarmashylyq zııaly qaýym ókilderi qatysty.
Gala-kontsert baǵdarlamasynda búkilreseılik jáne halyqaralyq baıqaýlardyń laýreaty Sofıa Onopchenkonyń, bashqurttyń «Ay Yola» folk-tobynyń, «Saha (ıAkýtııa) Respýblıkasynyń mádenıet salasynyń úzdigi» qurmetti ataǵynyń ıegeri Olena Ýýtaıdyń jáne ózge de ónerpazdardyń horeografııalyq, aspaptyq jáne vokaldyq-aspaptyq qoıymlymdary usynyldy.
Sonymen qatar qalmaqtyń halyq mýzykasy men býrıattyń halyq ánderi shyrqaldy. Keshte Máskeý memlekettik akademııalyq «Gjel» bı teatry, Daǵystannyń eńbek sińirgen akademııalyq «Lezgınka» bı ansambli jáne Qalmaqııa memlekettik «Oıraty» bı teatry óner kórsetti.
Aıta ketý kerek, Reseı Federatsııasynyń Qazaqstandaǵy mádenıet kúnderiniń baǵdarlamasy eki el arasyndaǵy mádenı-gýmanıtarlyq yntymaqtastyqty odan ári nyǵaıtýǵa baǵyttalǵan mazmundy is-sharalardy qamtıdy. Osy kúni Qazaqstan Respýblıkasynyń Ulttyq mýzeıinde «Mádenı dástúrlerdi biriktirý jáne zamanaýı shyǵarmashylyq tájirıbeler: Qazaqstan men Reseıdiń mádenı yntymaqtastyǵy» atty dóńgelek ústel ótip, onda jańa birlesken jobalar talqylandy. Budan bólek, elordada Qazaqstandaǵy Reseı kınosynyń festıvali bastaldy. Festıval kórsetilimderi 26 sáýirge deıin jalǵasady. Al, mádenıet kúnderiniń ashylýyndaǵy eń basty oqıǵa Reseı ónerpazdarynyń gala-kontserti boldy.
Osydan alty aı buryn Reseıde Qazaqstannyń mádenıet kúnderi tabysty ótken bolatyn. Onyń aıasynda kórermender Á.Qasteev atyndaǵy Ulttyq óner mýzeıiniń qorynan jasaqtalǵan «Qazaqstan óneriniń jaýharlary» kórmesimen tanysyp, Qazaqstan kınosy kúnderine qatysyp, sondaı-aq «Parasat maıdany» spektaklin tamashalady.
Baǵdarlama Úlken teatrda uıymdastyrylǵan Qazaqstan ónerpazdarynyń gala-kontsertimen aıaqtaldy. Memleket basshylarynyń qatysýymen ótken aıtýly oqıǵa mazmundy baǵdarlamasymen aıryqsha áser qaldyrdy.
Osyǵan deıin Astanada Reseıdiń Qazaqstandaǵy mádenıet kúnderi ótetini týraly jazdyq.
