Reseıdiń Irkýtsk oblysyndaǵy sanıtarlyq-epıdemıologııalyq jaǵdaı belgili boldy
ASTANA. KAZINFORM — Obaǵa qarsy kúres ınstıtýty qyzmetkeri qaıtys bolǵannan keıin Rospotrebnadzor Irkýtsk oblysyndaǵy jáne Irkýtsk jáne Shelehov qalalaryndaǵy sanıtarlyq-epıdemıologııalyq jaǵdaıdy tekserdi, dep habarlaıdy Kazinform TASS agenttigine silteme jasap.
Rospotrebnadzor Sibir jáne Qıyr Shyǵystyń Irkýtsk obaǵa qarsy kúres ınstıtýtynyń qyzmetkerine shyǵý tórkini belgisiz pnevmonııa dıagnozy qoıylǵannan keıin arnaıy sharalar keshenin qabyldady. Aýqymdy tekserý nátıjesinde naýqastan alynǵan materıaldan onyń kásibı qyzmetine baılanysty mıkroorganızmder anyqtalmaǵan.
— Sibir jáne Qıyr Shyǵystyń Irkýtsk obaǵa qarsy kúres ınstıtýtynda bıologııalyq qaýipsizdik talaptarynyń saqtalýyn baqylaý komıssııasynyń nátıjeleri boıynsha patogendi mıkroorganızmdermen jumys isteýge baılanysty eshqandaı tótenshe jaǵdaılar anyqtalǵan joq. Rospotrebnadzor basshysynyń nusqaýy boıynsha ınstıtýtqa jiberilgen saraptamalyq komıssııa nátıjelerdi rastady, — delingen málimdemede.
Rospotrebnadzor sonymen qatar «sońǵy 10 kúnde ınstıtýt qyzmetkerleri arasynda juqpaly aýrýlar týraly shaǵymdar tirkelmegenin» málimdedi.
2 qazanda Irkýtsk obaǵa qarsy ınstıtýtynda 28 jastaǵy zerthanashynyń qaıtys bolǵany týraly habarlandy. Ólimniń sebebi resmı túrde jarııalanǵan joq. Osydan keıin Irkýtsk oblysynda «asa qaýipti ınfektsııa» kúdigine baılanysty shuǵyl komıssııa otyrysy ótti.
Aıta keteıik, QR Densaýlyq saqtaý mınıstrligi Irkýtsk oblysyndaǵy jaǵdaıdy baqylaýda ustap otyr.
