Reseı Pavel Dýrovqa izdeý jarııalady
ASTANA. KAZINFORM – Telegram negizin qalaýshy Pavel Dýrovqa Reseıde terrorıstik áreketke kómektesti degen aıyp taǵylyp, oǵan halyqaralyq izdeý jarııalandy. Bul týraly Federaldy qaýipsizdik qyzmetiniń (FQQ) qoǵammen baılanys ortalyǵy habarlady, dep jazdy reseılik TASS.
- Telegram ákimshiliginiń basshysy P. Dýrovqa Reseıdiń Qylmystyq kodeksi 205.1-babynyń 1.1-bóliminde (lańkestik áreketke kómektesý) qarastyrylǵan is aıasynda aıyp taǵyldy. Oǵan halyqaralyq izdeý jarııalandy, - dep atap ótti Qoǵammen baılanys ortalyǵy.
Habarlamada «Reseı zańnamasyn buza otyryp, Telegram ákimshiligi osy messendjerdiń kóptegen arnalary, chattary jáne bottaryn joımaǵany, olardy Ýkraınanyń arnaıy qyzmetteri, lańkestik jáne ekstremıstik uıymdary Reseı Federatsııasynda dıversııalyq-terrorıstik, jappaı kisi óltirý jáne kıberalaıaqtyq áreketterin daıyndaý jáne úılestirý úshin belsendi túrde paıdalanyp otyrǵany, olardyń saldary áıelder men balalardy qosa alǵanda kóptegen adamdardyń qaza tabýyna, sondaı-aq mıllıardtaǵan dollarlyq materıaldyq shyǵynǵa ákep soqqany» aıtylǵan.
RF Qylmystyq kodeksi 205.1-babynyń 1.1-bólimi boıynsha kem degende bir terrorıstik qylmys jasaýǵa adamdy azǵyrǵany, jaldaǵany nemese basqasha tartqany úshin jaýapkershilik kózdelgen jáne 8 jyldan 15 jylǵa deıin bas bostandyǵynan aıyrý jazasy, 700 myń rýblge deıin qosymsha aıyppul nemese sottalǵan adamnyń eki jyldan tórt jylǵa deıingi tabysyn alý nemese ómir boıy bas bostandyǵynan aıyrý jazasy qoldanylýy múmkin.
Іs týraly aqparat
Bıylǵy jyldyń aqpan aıynda «Rossııskaıa gazeta» FQQ qujattaryna silteme jasaı otyryp Dýrovtyń áreketteri terrorızmge kómektesý boıynsha qylmystyq istiń bóligi retinde tergelip jatqanyn habarlady. FQQ qujattarynda 2022 jyldan beri Reseıde Telegram arqyly jasalǵan 153 myń qylmys tirkelgeni, onyń ishinde «Krokýs sıtı holdaǵy» terrorıstik shabýyldy uıymdastyrý, Darıa Dýgına, Maksım Fomınniń (Vladlen Tatarskıı) jáne RHBQ áskeriniń bastyǵy, general-leıtenant Igor Kırıllovty qosa alǵanda toǵyz joǵary laýazymdy áskerı sheneýniktiń ólimi, sondaı-aq áskerı shaqyrý bólimshelerine jarylystar men órteýdi uıymdastyrý bolǵany atap ótildi.
FQQ sońǵy birneshe jylda Telegram arqyly uıymdastyrylǵan 475 terrorıstik shabýyldyń, sonyń ishinde mektepterde jasóspirimderge jasalǵan 61 jappaı atystyń aldyn aldy. Sonymen qatar, reseılik áskerı qyzmetshilerdiń otbasy múshelerine qarsy shamamen 700 tikeleı qoqan-loqqy jasaý jaǵdaıy tirkeldi. Roskomnadzor Dýrovtyń komandasyna zańsyz mazmundy joıý talap etilgen 150 myńnan astam ótinish jiberdi, biraq olar eleýsiz qaldy.
Osyǵan deıin Pavel Dýrov Frantsııada ustalǵan bolatyn.
