Reseıdiń eki turǵyny Qazaqstanǵa temeki qospalaryn zańsyz tasymaldap kelgen
Reseıdiń eki azamaty 2022 jyldan beri Qostanaıǵa Qazaqstan aýmaǵynda aınalymǵa tyıym salynǵan temeki qospalaryn, temeki shegýge arnalǵan elektrondy qurylǵylardy jetkizýmen aınalysyp kelgen.
Bul týraly Kazinform Qarjylyq monıtorıng agenttiginiń baspasóz qyzmetine silteme jasap habarlaıdy.
«2022 jyldan bastap qazirgi ýaqytqa deıin Reseıden Qostanaı qalasyna Qazaqstan aýmaǵynda aınalymǵa tyıym salynǵan tıisti tańbasy joq, quramynda nıkotın bar veıpterdi, temeki qospalaryn jáne temeki shegetin elektrondyq qurylǵylardy ákelgen shetel azamattary A.B. Rıabchıkov pen G. V. Leıkınniń qylmystyq is-áreketin QMA Qostanaı oblysy boıynsha departamenti áshkerledi»,-delingen habarlamada.
Atalǵan tulǵalar Qazaqstanǵa temeki qurylǵylaryn aktsızdik jáne qosylǵan qun salyǵyn tólemeı, halyq tutynatyn taýar túrinde kirgizgen.
Zańsyz ákelingen aktsızdeletin ónim oblys aýmaǵynda jáne elimizdiń kórshiles oblystarynda satylǵan.
35,2 mln teńge somasyna veıpterdiń iri partııasyn ákelip, ótkizý kezinde, atalǵan tulǵalardy QMA Qostanaılyq departament qyzmetkerleri tutqyndady.
Sot úkimimen A. B. Rıabchıkov pen G.V. Leıkın kináli dep tanylyp, aıyppul tóleý túrindegi jazaǵa kesildi.
«QMA el aýmaǵynda temeki buıymdary men quramynda nıkotın bar suıyqtyqtardy satýǵa tıisti salyqtar tólengen jáne osy taýar úshin mindetti tańba bolǵan jaǵdaıda ǵana ruqsat etiletinin eskertedi»,-delingen habarlamada.
