Astanada myńǵa jýyq adam marafonǵa qatysty

ASTANA. KAZINFORM — Astanada kásipodaqtar qozǵalysynyń qurylǵanyna 120 jyl, «Taza Qazaqstan», «Jumysshy mamandyqtar jyly» taqyrybyna arnalǵan marafon uıymdastyryldy. Bul týraly elorda ákimdiginiń baspasóz qyzmeti jarııalady. 

Sporttyq is-sharaǵa kásipodaq jetekshileri men belsendileri, qala turǵyndary, balalardan jasaqtalǵan 1000-ǵa jýyq adam qatysty.

— Búgingi sporttyq is-shara dostyqtyń, yntymaqtastyqtyń merekesi dep aıtýǵa bolady. Bıyl ózderińiz biletindeı, Jumysshy mamandyqtar jyly atalyp ótýilýde. Osy oraıda búgingi jarysymyzǵa qatysýshylardyń basym kópshiligi qyzmetkerlerden quralyp otyr. Sporttyq jarystyń ereksheligi — buǵan deıin respýblıkamyzdaǵy basqa óńirlerde de osyndaı júgirister ótken bolatyn. Búgin sheshýshi sharamyzdy Astanada uıymdastyrýdy jón kórdik. Al júgiristen túsken qarajatymyz meıirimdilik qoryna baǵyttalady, — dedi QR Kásipodaqtar federatsııasynyń tóraǵasy Satybaldy Dáýletalın.

Qatysýshylar jarys barysynda eresekter 1.6, 5, 10 shaqyrymǵa júgirse, balalar 400 ben 1 shaqyrym qashyqtyqty baǵyndyrdy.

Yntymaqtastyq júgirisi Kásipodaqtar federatsııasy tarıhynda ekinshi márte ótkizildi. 2024 jyly qatysýshylar Botanıkalyq baqta atmosferasyn sezinse, bıyl qaıta jóndeýden ótken Trıatlon saıabaǵynda qashyqtyqtardy eńserdi.

— Men Soltústik Qazaqstan oblysy, Tımırıazevka aýdanynan júgirýge arnaıy kelip otyrmyn. Bilim salasynda qyzmet etemin. Aýyldyq jerde turǵandyqtan, kúndelikti júgirip, voleıbol oınaý arqyly salaýatty ómir saltyn ustanýǵa tyrysamyn. Áleýmettik jeliden búgingi sharany kórip, merekeniń bir múshesi bolýdy uıǵardym. Birinshi ret resmı sporttyq jarysta 10 shaqyrymdy júgirip óttim. Barlyǵy keremet, — dedi sharaǵa qatysýshy Álııa Anapıanova.

Qashyqtyqty baǵyndyrǵan barlyq sportshy marapatqa ıe bolyp, qatysýshylar arasynda lotereıa arqyly syılyqtar oınatyldy.

Aıta keteıik, qarýly kúshterdiń áskerı qyzmetshisi 600 shaqyrymdyq sýpermarafondy eńserdi.