Reseıdiń Atyraýmen shekaralas óńirinde afrıkalyq shoshqa obasynyń oshaǵy anyqtaldy

Atyraý oblysymen shekaralas qonystanǵan Astrahan óńirinde juqpaly eki aýrýdyń oshaǵy anyqtalyp otyr. Aýrýdyń biri – brýtsellez, ekinshisi – afrıkalyq shoshqa obasy, dep habarlaıdy Kazinform.

Reseı Tótenshe jaǵdaılar mınıstrliginiń Astrahan oblysy boıynsha bas basqarmasy tabıǵı sıpattaǵy tótenshe jaǵdaıdyń týyndaýy múmkin ekenin eskertti.

«Astrahan oblysynyń Prıvoljsk, Enotaev jáne Harabalın mýnıtsıpaldy aýdandarynda múıizdi iri qaradan brýtsellez aýrýy anyqtaldy. Ahtýbınsk mýnıtsıpaldy aýdanynyń aýmaǵynda afrıkalyq shoshqa obasynyń oshaǵy anyqtalyp otyr», - dep habarlaly Astrahan oblysy boıynsha bas basqarmasy.

Eske sala ketelik, budan buryn Atyraý oblysy men Reseı arasyndaǵy saýda aınalymy 30 mln AQSh dollaryna jýyqtaǵanyn jazǵan edik.

Bıyl Atyraý oblysynyń ákimi Serik Shápkenov men Reseı Federatsııasyndaǵy Astrahan oblysynyń gýbernatory Igor Babýshkın 2023-2026 jyldarǵa saýda-ekonomıkalyq, mádenı-gýmanıtarlyq qatynastardy nyǵaıtý jónindegi qujatqa qol qoıdy.

Ákimniń málimetinshe, 2023 jyldyń qańtar aıynda Atyraý oblysynyń Reseı Federatsııasymen syrtqy saýda aınalymy 29,7 mln AQSh dollaryn quraǵan. Onyń ishinde eksport – 6,2 mln, ımport kólemi 23,5 mln AQSh dollaryna jetken.