Reseıdiń Amýr oblysynda mas júrgizýshi adamdardy qaǵyp, mert qyldy
ASTANA. KAZINFORM – Reseıdiń Amýr oblysy Blagoveşensk qalasynda mınıven trotýarda ketip bara jatqan adamdardy qaǵyp ótti, dep habarlaıdy reseılik TASS agenttigi.
Agenttiktiń habarlaýynsha, oqıǵa ornynda 3 adam qaza tapqan, onyń ekeýi bala. Sonymen qatar taǵy 6 adam aýrýhanaǵa túsken, onyń úsheýi bala. Keshirek zardap shekken 50 jastaǵy áıel men 15 jastaǵy jasóspirimniń aýrýhanada mert bolǵany anyqtaldy.
Sońǵy málimetter boıynsha, 14 jastaǵy bala men 32 jastaǵy áıel reanımatsııada jatyr jáne olardyń jaǵdaıy óte aýyr. Zardap shekken taǵy 14 jastaǵy bala men 19 jastaǵy qyz reanımatsııadan travmotologııa bólimine aýystyrylǵan.
Oqıǵa ornyna 9 jedel járdem toby shaqyrylǵan. Zardap shekkenderdiń barlyǵy Amýr oblysynyń aýrýhanasyna jetkizilgen.
Adamdardy qaqqan júrgizýshiniń ózi jeńil jaraqat alǵan.
Aldyn ala málimetter boıynsha, ol saǵatyna 100 km jyldamdyqpen kele jatyp kólikti basqara almaı qalǵan. Tergeý málimetteri boıynsha, ishimdikke sylqııa toıǵan júrgizýshi jol jıegine shyǵyp ketip, jaıaý júrginshilerdi qaǵyp ótken.
Reseıiń Tergeý komıteti is qozǵady, júrgizýshi 15 jylǵa bas bostandyǵynan aıyrylýy múmkin. Ol qazir qamaýda. Amýr oblysynda oıyn-saýyq is-sharalaryna tyıym salynǵan.
