Reseıdiń áleýeti sheksiz: Tramp Pýtınmen sóıleskenin joǵary baǵalady

ASTANA. KAZINFORM — AQSh prezıdenti Donald Tramp Reseı prezıdenti Vladımır Pýtınmen telefon arqyly áńgimesin oń baǵalap, Reseı men Ýkraına arasyndaǵy kelissózderdiń «jedel» bastalatynyn málimdedi, dep habarlaıdy Kazinform tilshisi.

— Jańa ǵana Reseı prezıdenti Vladımır Pýtınmen eki saǵattyq telefon áńgimem aıaqtaldy. Men bul áńgimeniń óte jaqsy ótkenin aıta alamyn. Reseı men Ýkraına dereý atysty toqtatý jáne, odan da mańyzdysy, soǵysty toqtatý jóninde kelissózder bastaıdy, — dep jazdy Donald Tramp Truth Social jelisinde.

AQSh prezıdenti eki tarap kelissózderdiń naqty sharttaryn ózara kelisetinin, óıtkeni «olar basqalar bilmeıtin mańyzdy jaıttardan» habardar ekenin aıtty.

— Bul qandy qyrǵyn soǵys aıaqtalǵannan keıin, Reseı AQSh-pen aýqymdy saýda qatynastaryn damytqysy keledi, jáne men muny quptaımyn. Reseıde jumys oryndaryn kóptep ashýǵa jáne halyqtyń ál-aýqatyn arttyrýǵa zor múmkindik bar. Onyń áleýeti sheksiz. Ýkraına da óz elin qalpyna keltirý kezinde saýdadan úlken paıda taba alady, — dedi Tramp.

Donald Tramp kelissózderdiń dereý bastalatynyn atap ótti jáne bul jaıynda kelesi halyqaralyq kóshbasshylardy habardar etkenin jetkizdi:

• Ýkraına prezıdenti Vladımır Zelenskıı;

• Eýropalyq komıssııa prezıdenti Ýrsýla fon der Lıaıen;

• Frantsııa prezıdenti Emmanýel Makron;

• Italııa premer-mınıstri Djordjııa Melonı;

• Germanııa kantsleri Frıdrıh Merts;

• Fınlıandııa prezıdenti Aleksandr Stýbb.

Sonymen qatar, Vatıkan da, Rım papasynyń ókildigi arqyly, bul kelissózderge erekshe qyzyǵýshylyq tanytqany atap ótildi.

Buǵan deıin AQSh prezıdenti Donald Tramp dúısenbi kúni reseılik áriptesi Vladımır Pýtınmen Ýkraınadaǵy qaqtyǵysty toqtatý máselesi boıynsha kelissózder júrgizgenin jazdyq.