Reseıdiń Ýlıanovsk qalasy sý astynda qaldy
ASTANA. QazAqparat - Reseıdiń Ýlıanovsk qalasy sý astynda qaldy. Kesheden beri tolassyz jaýǵan jańbyr saldarynan kóshelerdi sý alyp, qatty jelden aǵashtar tamyrymen birge qulady. Qazirgi kezde Ýlıanovskide tótenshe jaǵdaı jarııalanyp otyr, dep xabarlaıdy QazAqparat tilshisi.
Sońǵy 25 jylda Ýlıanovskide ondaı jaǵdaı bolmaǵan. Sınoptıkterdiń boljamyna sáıkes, aldaǵy ýaqytta tsıklon kúsheıe túsedi. Tabıǵattyń tosyn minezi 10 shildege deıin basylmaýy ábden múmkin.
Keshe tolassyz jaýǵan jańbyrdyń saldarynan joldardy sý shaıyp, qalanyń ishinde keptelister paıda boldy. Kólikterge sý kirip jatyr. Qozǵaltqyshtar isten shyǵýda. Osyǵan baılanysty jergilikti bılik ázirshe jeke kólikpen júrmeýge keńes berip otyr. Degenmen, qoǵamdyq kólik te durys qatynamaıdy. Temirjol jelisinde de aqaýlyq kóp.
Tabıǵattyń tosyn minezinen ajal qushqandar da bar. Máselen, kúni keshe qatty jeldiń saldarynan aǵash elektr jelilerge qulap, zeınet jastaǵy adamdy mert qyldy. Aýlada turǵan kólikterge qulaǵan aǵashtar da kóp.
Aımaq gýbernatory Sergeı Morozov jumys berýshilerge úndeý joldap, jumysqa keshigip keletin azamattarǵa túsinistikpen qaraýdy surady. "Qaladaǵy jaǵdaı áli de qıyn bolyp tur. Qyzmekterlerińiz keshikse, shara qoldanbaýyńyzdy suraımyn. Túsinistikpen qaraǵanymyz durys", - dedi aımaq basshysy.
