Reseıdiń Tver oblysyndaǵy ǴZI-da bolǵan órtten 17 adam qaza tapty

MÁSKEÝ. TASS – QazAqparat – Reseıdiń Tver qalasynda ornalasqan Áýe-ǵarysh qorǵanysy áskeriniń Ortalyq ǵylymı-zertteý ınstıtýtynda bolǵan órt saldarynan 17 adam qaza tapty, dep habarlaıdy QazAqparat reseılik TASS agenttigine silteme jasap.

Densaýlyq saqtaý mınıstrliginiń málimetinshe, Tver oblysynda órt saldarynan bolǵan qırandylardy tazartý jumystaryna 150 adam jumyldyrylǵan.

Tver oblysy densaýlyq saqtaý qyzmetiniń málimetinshe, órtten zardap shekkender arasynda 13 adam aýrýhanaǵa túsken, onyń ishinde 5 adam jansaqtaý bóliminde jatyr, olardyń densaýlyq jaǵdaıy aýyr, biraq turaqty. Olar saýyǵyp ketedi degen úmit bar.

Osyǵan deıin TASS agenttigi aýrýhanada 11 adamnyń jatqanyn habarlaǵan edi.

Ǵylymı-zertteý ınstıtýtyndaǵy órt beısenbi kúni boldy. Jalyn 22,5 km aýmaqty sharpydy. Ǵımarattan 54 adam qutqarylyp, 98 adam kóshirildi. 30-ǵa jýyq adam zardap shekti.

Aldyn ala málimetter boıynsha, órttiń shyǵýyna elektr jelisiniń apatty rejımde jumys isteýi sebep bolǵan. Al jalynnyń barynsha keń aýmaqty sharpýyna órt sóndirýshilerge habardyń kesh jetýi sebep bolýy yqtımal.