Reseıdiń Tver oblysy aýmaǵynda úsh qazaqstandyq jaýyngerdiń súıegi tabyldy
KÓKShETAÝ. QazAqparat - Reseıdiń Tver oblysy Rjev aýdany aýmaǵynda júrgizilgen halyqaralyq ekspedıtsııa barysynda «Pıoner» izdeý toby soǵys jyldary qaıtys bolǵan qazaqstandyq jaýyngerlerdiń súıekterin tapty. Bul týraly top jetekshisi Mıhaıl Bogdanovtyń áleýmettik jelidegi paraqshasynda jarııalandy, dep habarlaıdy QazAqparat tilshisi.
Qazirgi ýaqytta aqmolalyq Zeınolla Maqaev, Kamen Jumanov jáne Qaraǵandy oblysynyń týmasy Jaǵypar Orazbaevtyń esimderi jazylǵan medalon tabyldy.
Top jetekshisi Mıhaıl Bogdanovtyń aıtýynsha, Rjev aýdanynyń jerinde sol qorqynyshty ýaqyttyń kóptegen «aıǵaqtary» - jaýyngerlerdiń, oqtardyń, snarıadtardyń qaldyqtaryn kezdestirýge bolady.
«Asyqpaı jerdi qýys burǵymen tekserip júrgen edim. Eńkeıe bergenimde jer betinde ólim medaliniń bakelıttik qaryndash kapsýlany baıqap qaldym. Mundaı jaǵdaılar jıi bolyp turady, biraq meniń tájirıbemde birinshi ret. Kapsýlanyń qaqpaǵyn burap ashyp edim, ishinde jazbasy jaqsy kúıde saqtalypty», - dep bólisti top jetekshisi áleýmettik jelide.
Belgili bolǵandaı, ol kapsýla jaýynger Zaınýlla Makaevka tıesili eken.
«1922 jyly týǵan, qyzyl ásker-114-shi jeke atqyshtar brıgadasynyń atqyshy, zagradotrıad (2-shi vzvod), jaýyngerdiń meken - jaıy (otbasynyń meken - jaıy): Qazaq KSR, Aqmola oblysy, Aqmola qalasy, Telman kóshesi, 41-úı, anasy-Bátıma Mámirova», - delingen qysqa jazbada.
Belgili bolǵandaı, qyzyl ásker jaýyngeri 11.08.42 jyly «Belkovo-Svınıno» tirek pýnkti úshin shaıqasta qaza tapqan.
Aqmola oblysynyń taǵy bir jaýyngeri Kámen Jumanov 1941 jyly Qorǵaljyn aýdanynyń Kırov atyndaǵy keńshardan Qyzyl Armııa qataryna shaqyrylǵan. Osy ýaqytqa deıin ol habar-osharsyz ketken dep sanaldy. Qazirgi ýaqytta onyń urpaqtary Qorǵaljyn aýdanynda turyp jatyr. Jergilikti jýrnalıster Kamen Jumanovtyń qyzy Mádenıet apaıdy izdep tapty. Jasy 83-tegi keıýananyń aıtýynsha, ol ákesi maıdanǵa ketken kezde úsh jasta bolǵan. Onyń qolynda qazir ákesiniń soǵysqa deıingi fotosýreti ǵana saqtalǵan. Mádenıet apaıǵa ákesiniń urys dalasynda jaralanyp, taldyń túbinde qalǵany týraly maıdanger joldastary aıtqan. Budan ózge aqparat joq.
Batyrdyń jalǵyz qyzy ákesi qaıtys bolǵan Reseıdiń Rjev aýdanyna barýdy, sondaı-aq ákesiniń súıegin týǵan jerine ákelip jerleýdi josparlap otyr. Osy rette, Qorǵaljyn aýdanynyń ákimdigi de batyrdy týǵan jerine jerleýge kómektesetindikterin aıtýda.
Aıta keteıik, Qorǵaljyn aýdanynan maıdanǵa eki myńǵa jýyq sarbaz attandy. Olardyń ishinde tek 600 jaýynger ǵana úıine oraldy. Sońǵy maıdanger 2015 jyly ómirden ótken.
