Reseıdiń Túmen oblysyndaǵy «Jas urpaq» qazaq balalar shyǵarmashylyǵynyń baıqaýy ótti

TÚMEN. QazAqparat – Reseıdiń Túmen qalasyndaǵy óner kolledjinde «Jas urpaq»qazaq balalar shyǵarmashylyǵynyń birinshi oblystyq festıval-baıqaýy ótti, dep habarlaıdy QazAqparat RF-daǵy Qazaqstan elshiliginiń saıtyna silteme jasap.

Bul Túmen oblysynyń oqýshylary úshin óńirde turatyn halyqtardyń ózara is-qımylyn nyǵaıtýǵa, qazaq mádenıeti men tilin saqtaýǵa jáne damytýǵa baǵyttalǵan etnomádenı joba. Ol qazaqtardyń aımaqtyq ulttyq-mádenı avtonomııasynyń bastamasymen uıymdastyrylyp, 17-21 jeltoqsanda Túmen oblysynda ótken qazaq mádenıeti kúnderiniń basty oqıǵasy boldy.

Festıval fınalynda Qazan, Abat, Iset, Esil, Omýtın, Túmen, Ýporov, Golyshman jáne Zavodoýkovka qalalyq okrýgterinen, Esil jáne Túmennen 38 qatysýshy jáne shyǵarmashylyq ujymdar óner kórsetti.

Festıval-baıqaýdyń qurmetti qonaqtary: Túmen oblysynyń ulttar isteri jónindegi komıtetiniń tóraǵasy Vladıslav Chernov, Túmen oblysynyń Ulttyq qoǵamdyq birlestikteriniń úılestirý keńesiniń tóraǵasy Evgenıı Vorobev, Túmen oblystyq dýmasynyń depýtattary Vladımır Stolıarov jáne Dmıtrıı Novıtskıı, Túmen qalasyndaǵy Qazaqstan Respýblıkasynyń qurmetti konsýly Vladıslav Kvasov, soltústik Oraldaǵy Memlekettik Agrarlyq ýnıversıtetiniń rektory Elena Boıko boldy.

«Jańa festıval bastaýynyń bolashaǵy zor, óıtkeni adamnyń negizgi dúnıetanymdyq belgileri balalyq shaqta qalanady,jáne búgingi kúni óskeleń urpaqqa qandaı qundylyqtar salatyndyǵymyzǵa Túmen oblysyndaǵy qazaq mádenıetiniń bolashaǵy baılanysty», delingen habarlamada.