Reseıdiń sýperlıgasynda oınap, Qazaqstan namysyn qorǵaǵym keledi - Maksım Ótebalıev

- Dopty hokkeıge men alty jasymda keldim, - dedi Maksım. Aǵam Meńjan jetelep ákelip, topqa qosty da jiberdi. Sodan beri dopty hokkeımen aınalysyp kelemin. Árıne, meniń ómir belesterine kóterilýime aldymen otbasym qoldaý kórsetti. Anam Gúljan jeke kásipker, sosyn ájem bar. Aǵam óz otbasyn qurdy. Kásibı sport jolyna men ǵana túskennen keıin bári tilekshi bolyp otyrady. «Eýrazııa» tilder jáne menedjment ınstıtýtyn qarjyger mamandyǵy boıynsha bitirdim.
 

- Maksım, qurylǵanyna qyryq jyldan asqan «Aqjaıyq» klýby úshin bıylǵy maýsym sátti boldy deýge qazirdiń ózinde negiz bar, solaı ǵoı?

- Iá, komanda alǵa qoıǵan fınalǵa shyǵý maqsatyn oryndady. Jalpy, aldyńǵy maýsymmen salystyrǵanda, komandada biraz ózgerister boldy. «Aqjaıyqtyń» tizginin Saratovtan kelgen reseılik maman Vladımır ıÝrevıch Kojevnıkov qolǵa alsa, jańa oıynshylar da kelip, tyń lep qosty. Osy maýsymda bizder óz aıdynymyzda eshkimge des bergen joqpyz. Kezdesýlerdiń bárinde jeńiske jettik. Syrt aıdyndaǵy oıyndardan da barynsha upaı ala bildik. Munyń bári komandanyń aıqyn baǵyt-baǵdar ustanǵandyǵyn kórsetedi.

- «Aqjaıyqtyń» surmergeni, reseılik shabýylshy Sergeı Bashaev osy bir ǵana maýsymda 65 gol soqqan eken. Óziń de aıanyp qalǵan joqsyń. Seniń esebińde qansha dop bar, komandada jaqyn dosyń kim?

- Iá, jeńiske barlyq oıynshylar da úles qosady ǵoı. Men qarsylastar qaqpasyn 24 ret dál kózdedim. Alda fınaldyq saıystar bar, onda da qarap qalmaspyn. Kapıtan bolǵannan keıin bárimen jaqsy qarym-qatynastamyn, bir-birimizdi túsinip, ortaq maqsatqa jumylyp otyramyz. Degenmen 2011 jyly Almatyda ótken qysqy Azııa oıyndarynyń chempıony, halyqaralyq dárejedegi sport sheberi Elaman Álipqalıevti eń jaqyn dosym dep sanaımyn.
 

- Bıylǵy úlken tabysyńnyń biri mamandardyń kózine túsip, dopty hokkeıden Qazaqstan ulttyq quramasyna alynyp, álem chempıonatyna qatysýyń dep oılaımyn. Bul da serpin bergen shyǵar?

- Árıne, álemdik dodany kózben kórýdiń ózi bir ǵanıbet qoı. Ázirge oınaı qoımasam da, biraz tájirıbe jınaqtadym. Áli jaspyn, bıyl 22-ge tolamyn, sondyqtan basty tabystarym alda dep oılaımyn.

Maksım Ótebalıev pen komanda jóninde «Aqjaıyq» sport klýbynyń dırektory Azamat Shaıhy da óz pikir-paıymyn bildirdi.

«Maksım Ótebalıev bıyl ózin jaqsy qyrynan kórsetti, kóshbasshylyq qasıeti de bar. Ulttyq quramaǵa alyndy. Endi aldaǵy jyly ótetin álem chempıonatyna da qatysady. Onyń ar jaǵynda 2019 jyly Krasnoıarskide ótetin HHІH dúnıejúzilik qysqy ýnıversıadaǵa, buıyrsa, dopty hokkeıden Qazaqstan quramasyn kapıtan retinde bastap baratyn bolady. Óıtkeni quramanyń qazirgi kapıtany, 2011 jylǵy Azıada chempıony, tórt márte álem chempıonatynyń qola júldegeri Raýan Isalıevtiń jasy kelmeıdi. Sondyqtan onyń ornyn jastar baspaq. Jalpy, «Aqjaıyqtan» ulttyq quramaǵa alynatyndaı hokkeıshiler bar. Mysaly, qaqpashy Narıman Takırovty kelesi álem chempıonatyna qospaqshymyz. Qorǵaýshy Pavel Chebakov pen jartylaı qorǵaýshy, Azıada chempıondarynyń biri Samat Amanshındi baıqap kórýge bolady. Elaman Álipqalıev te tuǵyrdan taıa qoıǵan joq. Sol sekildi qaýlap ósip kele jatqan jastar bar. Mysaly, 1998 jylǵy Andreı Gýşın qorǵaýshy bolsa da, aıdynǵa shyǵyp, qarsylastar qaqpasyna gol salyp úlgerdi. Odan birer jas úlken Bekzat Batyrhan, Bolat Muhıt, Andreı Malyshevterden de úmit kútemiz. Bir atap ótetin jaıt, 2016 jyly komandaǵa reseılik legıonerlerdiń qosylýy oraldyq oıynshylardyń shıryǵyp, shıraýyna áser etti. Sonymen qatar kelisimshartqa qol qoıar kezde reseılikterge keıingi jetkinshekterge de bilgenderin úıretip, sheberlik dáristerin ótkizý jóninde talap qoıdym. Bul da balalardyń qyzyǵýshylyǵyn arttyryp, aldaryna úlken maqsat qoıýyna septesýde. Onyń ústine «Jastar» stadıonynda «QPO b.v.» kompanııasynyń qarjysy esebinen jasandy muz aıdyny salynyp jatqany belgili. Merdigerler aldaǵy mamyr aıynda bitiremiz dep otyr. Jasandy muz aıdyny iske qosylsa, kún ilgeri daıyndala alatyn oıynshylardyń sheberligi artady, múmkindik te molaıady. Sanaýly kúnderden keıin Syktyvkarda bastalatyn fınaldyq oıyndarda jaqsy óner kórsetip, alǵashqy úshtikke iligýdi kózdep otyrmyz. Túpki maqsat - Reseıdiń sýperlıgasyna shyǵyp, Qazaqstannyń myqty komandasyna aınalý», dedi «QazAqparat» tilshisine A.Shaıhy.
 

Eske sala keteıik, ekinshi topta «Aqjaıyq» 49 upaımen birinshi oryndy ıelense, úzdik úshtikke sondaı-aq «Znamıa-Ýdmýrtııa» (Votkınsk, 48 upaı), sosyn «Maıak» (Krasnotýrınsk, 47 upaı) komandalary endi. Syktyvkar qalasynda 28 aqpan - 6 naýryz aralyǵynda ótetin fınaldyq týrnırde «Stroıtel» (Syktyvkar), «Mýrman» (Mýrmansk), «Aqjaıyq», «Znamıa-Ýdmýrtııa», «Maıak»,  «Saıany» (Abakan), «Enıseı-2» (Krasnoıarsk) komandalary sýperlıgaǵa beriletin qos joldamany sarapqa salady. Oraldyqtar fınaldyq saıystarǵa óz tarıhynda osymen on ekinshi ret qatysqaly otyr.