Reseıdiń Sýdandaǵy elshisiniń ólim sebebi anyqtaldy
ASTANA. QazAqparat - 23 tamyz kúni Reseıdiń Sýdandaǵy elshisi óli kúıinde tabylǵan bolatyn. 62 jastaǵy Mırgaıas Shırınskıı júrek talmasy saldarynan kóz jumǵany anyqtaldy. Bul týraly RT-ǵa Hartýmdaǵy Reseı dıplomatııalyq ókildiginiń baspasóz hatshysy Sergeı Konıashın habarlady.
«Mırgaıas Mırgaıasovıchti elshiliktiń qyzmetkerleri keshki saǵat altyda óz rezıdentsııasynda ótkir júrek talmasy belgilerimen tapqan. Dereý dárigerler shaqyrtyldy, ókinishke oraı, onyń ómirine arasha bola almady», - dedi dıpmıssııa ókili.
Konıashınniń aıtýynsha, qaıtys bolǵan dıplomattyń denesi Hartým akademııalyq gospıtali janyndaǵy máıithanaǵa berildi. Keıin máıitti Reseıge jiberý máselesi sheshiledi.
23 tamyz kúni Hartýmda Reseı elshisi Mırgaıas Shırınskııdiń ómirden ozǵanyn buǵan deıin habarlaǵan bolatynbyz.
Mırgaıas Shırınskıı 1954 jyly týǵan. 1991-1993 jyldary Iemendegi RF elshiliginde keńesshi-elshi, 1993-1996 jyldary Djıdda qalasynda (Saýd Arabııasy) Reseıdiń Bas konsýly qyzmetin atqarǵan. 2006-2013 jyldary ol Rýandada elshi boldy. 2013 jyldyń sońyna qaraı Sýdandaǵy elshi qyzmetine taǵaıyndalǵan.
