Reseıdiń sýdıalary Qazaqstannyń Áskerı sotynyń qyzmetimen tanysty

ASTANA. QazAqparat - Áskerı sottyń jumysymen kórnekti tanysý maqsatynda Reseı Federatsııasy Joǵarǵy Sotynyń delegatsııasy Qazaqstan Respýblıkasy Áskerı sotyna keldi, dep habarlaıdy atalmysh sottyń baspasóz qyzmeti.

Delegatsııa quramynda RF Joǵarǵy Sotynyń janyndaǵy Sot departamenti Bas dırektorynyń orynbasary Vıktor Ageev, Kostromsk oblystyq jáne Soltústik Kavkaz okrýgtik áskerı sottarynyń tóraǵalary, Sot departamenti basqarmalarynyń bastyqtary, sondaı-aq «Pravosýdıe» Memlekettik taldamalyq júıesin qoldaýdyń aqparattyq-saraptamalyq ortalyǵy» federaldik memlekettik bıýdjettik mekemesiniń basshysy Leonıd ıÝhnevıch boldy.

Kezdesýde «100 naqty qadam» Ult Josparyn júzege asyrý aıasynda júrgizilgen sot reformasy talqylandy.

Sheteldik qonaqtar Áskerı sottyń ǵımaratyn aralap, Áskerı sottyń tarıhymen, barlyq respýblıka áskerı sottarynan jınalǵan tarıhı qujattarmen jáne sýrettermen tanysty.

Áskerı sot tóraǵasy S.Abdýllaev táýelsiz  Qazaqstannyń Áskerı sottarynyń qurylý tarıhy 1992 jyldan, ıaǵnı Qazaqstan Respýblıkasynyń Joǵarǵy Keńes Prezıdıýmynyń 1992 jylǵy 20 qańtardaǵy qaýlysymen QazKSR aýmaǵynda jumys jasaǵan áskerı trıbýnaldardyń Qazaqstan Respýblıkasynyń ıýrısdıktsııasyna ótken kúninen bastaý alatynyn aıtty. Sonymen qatar, búgingi kúni elimizdiń 10 qalasynda ornalasqan 11 garnızondyq áskerı sottyń jumys jasap jatqandyǵy aıtyldy.   

Meımandarǵa sot júıesine engizilgen zamanaýı aqparattyq tehnologııalar tanystyryldy.

Áskerı sottar ákimshisiniń basshysy N.Baıtilesov qonaqtarǵa aýdıo-beınetirkeý qurylǵysynyń múmkindikterin, «Sot kabıneti» servısteriniń jumysyn  kórnekti túrde tanystyryp shyqty. 

Qonaqtar qazaqstandyq áriptesteriniń tájirıbesin atap ótip, sot jumysymen tanystyrǵany úshin sot basshylyǵyna alǵystaryn bildirdi. 

Kezdesýdiń sońynda taraptar estelik syılyqtarmen almasty.