Reseıdiń Samara oblysynda jol apatynan 12 adam qaza tapty
MÁSKEÝ. TASS-QazAqparat – Reseıdiń Samara oblysynda júk kóligi, jeńil kólik jáne shaǵyn jolaýshylar avtobýsy soǵylǵan jol apatynda 12 adam qaza tapty, dep habarlaıdy QazAqparat TASS agenttigine silteme jasap.
«Qazirgi málimet boıynsha jol-kólik oqıǵasynan 12 adam qaza tapty. Taǵy 12 adam túrli jaraqat aldy. Bes adam jansaqtaý bóliminde jatyr», - delingen Reseıdiń Tergeý komıteti taratqan habarlamada.
Oblys basshysy Dmıtrıı Azarovtyń aıtýynsha, jol apatynan zardap shekkender Syzrandaǵy ortalyq aýrýhanaǵa jetkizilgen. Samaraǵa kómekke Tolıattı qalasynan jedel járdem brıgadalary jiberilgen. Jol apatynan Ýlıanov jáne Samara oblystarynyń turǵyndary zardap shekken.
Jol apaty juma kúni keshke federaldyq «Ýral» M-5 tas jolynyń 873-shaqyrymynda Samara oblysynyń Zaborovka kentiniń janynda bolǵan. Júk kóligi, jeńil kólik jáne shaǵyn jolaýshylar avtobýsy bir-birine soǵylǵan.
