Reseıdiń resmı ókilderiniń jıilep ketken orynsyz málimdemeleri úlken alańdaýshylyq týǵyzýda - QR SІM
ASTANA. QazAqparat - Qazaqstannyń syrtqy ister mınıstrligi Hakasııa Respýblıkasynyń Joǵarǵy keńesiniń tóraǵasy Vladımır Shtygashevtyń Qazaqstannyń shyǵys oblystaryna Reseıdiń tarıhı quqyǵy bar-mys degen retsiz málimdemesine nazar aýdardy.
«Sonymen qatar, biz Hakasııa Respýblıkasynyń Joǵarǵy keńesiniń sheneýnikteriniń V.Shtygashevtyń sózderin BAQ ókilderi burmalady degen málimdemesine de nazar aýdardyq. Alaıda, qalyptasqan jaǵdaıda mundaı túsiniktemeler jetkiliksiz jáne qanaǵattandyrarlyq emes dep esepteımiz. Sondaı-aq, bizdiń qoǵam V.Shtygashevtyń málimdesin ótkir synmen qabyldaǵanyn bilemiz jáne qoǵam músheleri Qazaqstan men Reseı Prezıdentteri N.Nazarbaev pen V.Pýtın 2005 jylǵy 18 qańtar kúni qol qoıǵan Qazaqstan Respýblıkasy men Reseı Federatsııasy arasynda qazaqstan-reseılik memlekettik shekara týraly Kelisimniń erejesine nazar aýdarady. Atalǵan Kelisimniń 2006 jylǵy 12 qańtar kúni kúshine enýi eki el arasyndaǵy memlekettik shekaranyń ótýin zańdy túrde bekitti. Reseı Federatsııasy resmı ókilderiniń jıilep ketken orynsyz málimdemeleri úlken alańdaýshylyq týdyrmaýy múmkin emes», - delingen vedomstvonyń málimdemesinde.
SІM habarlaýynsha, QR men RF qatynastary eki el halyqtarynyń tereń tarıhı jáne rýhanı baılanystaryna negizdelgen, bul eki memlekettiń de ulttyq múddelerine saı keletin jáne eýrazııalyq keńistikte beıbitshilik, qaýipsizdik pen turaqtylyqqa qyzmet etetin teń quqyly strategııalyq áriptestikti damytýdyń kepili bolyp tabylady.
«Hakasııa Respýblıkasynyń Joǵarǵy Keńesiniń tóraǵasy aıtqan sózderine qatysty QR SІM óz tarapynan dıplomatııalyq arnalar arqyly bizdiń Astanadaǵy jáne Máskeýdegi reseılik áriptesterimizben tıisti jumystar júrgizýde. Atap aıtqanda, máseleni anyqtaý maqsatynda QR Syrtqy ister mınıstrligine Reseı Federatsııasynyń Qazaqstandaǵy Tótenshe jáne Ókiletti Elshisi Mıhaıl Bocharnıkov shaqyryldy. RF resmı bıligi V.Shtygashevtyń málimdemesine baǵa beredi dep senemiz», - delinedi málimdemede.
