Reseıdiń Omsk qalasynda soltústikqazaqstandyq ónim óndirýshilerdiń dúkeni ashyldy
ASTANA. QazAqparat - Reseıdiń Omsk qalasynda «Kazmarket» dúkeni ashyldy. Bul jerden qala turǵyndary Soltústik Qazaqstan oblysyndaǵy ónim óndirýshilerdiń et, sút ónimderin satyp alýǵa bolady, delingen QR Reseıdegi elshiliginiń saıtynda.
Dúken 8-9 qarasha aralyǵynda Chelıabınsk qalasynda ótetin Qazaqstan men Reseıdiń óńiraralyq yntymaqtastyǵy forýmy qarsańynda ashyldy. Jaqyn kúnderde qazaqstandyq ónimder saýdalanatyn taǵy bir oryn ashylmaq.
Aıta keteıik, bıylǵy jyldyń tamyz aıynyń sońynda Omsk oblysy ekonomıka mınıstriniń orynbasary Denıs Kýshner óńirde Soltústik Qazaqstan oblysy taýarlarynyń jeke saýda úıin ashý men Petropavl qalasynda óndirilgen azyq-túlik ónimderiniń arnaıy jármeńkesin ótkizý týraly josparymen bólisti.
Onyń sózinshe, Qazaqstan Omsk oblysynyń basty syrtqy seriktesi, búgingi tańda bul saladaǵy úles 30 protsentti qurap otyr.
«2017 jyldyń qańtar-maýsym aralyǵynda Qazaqstannyń Omsk oblysymen taýar aınalymy $143,6 mln qurap, ósim ótken jyldyń sáıkes merzimimen salystyrǵanda, 33 protsentke jetti».
