Reseıdiń «Mýlt» kanalynda qazaq tilindegi ónimder kórsetile bastady

NUR-SULTAN. QazAqparat - Reseılik operatorlar Qazaqstannyń telearnalaryn kórsetedi. Bul týraly halyqpen eseptik kezdesýinde QR Aqparat jáne qoǵamdyq damý mınıstri Dáýren Abaev málim etti, dep habarlaıdy QazAqparat tilshisi.

«Qazir aqparat salasy boıynsha bizdiń mınıstrlik tıisti zańdy jetildirý jumystaryn jalǵastyryp jatyr. Qajetti túzetýler engizý de josparymyzda bar. Atap aıtar bolsam, buqaralyq aqparat quraldarynda keıbir ónimderin jarnamalaýǵa tyıym salýdy toqtatý, memlekettik tapsyrysty aımaq deńgeıindegi memlekettik satyp alý júıesinen shyǵarý, buqaralyq aqparat quraldaryn salyqtan bosatý, «sur tarelkalardyń» taralýyna shekteý qoıý sharalary», - dedi mınıstr

Onyń sózine qaraǵanda, BAQ salasyn jańǵyrtý men sapaly televızııalyq kontent qalyptastyrý jumystary da bir sátke toqtaǵan joq. Bul jumys jalǵasa beredi.

«Mysaly, «Tamasha TV» dep atalatyn birinshi ázil-syqaq baǵytyndaǵy telearna óz baǵdarlamalaryn kórermen nazaryna usyna bastady. «EL ARNA» kınokanaly da damyp kele jatyr. Olar bıyl habar taratýdyń jańa satysyna kóterildi. Endigide bul telearna arqyly tek qana otandyq fılmderdi emes, teatr sahnasyndaǵy úzdik qoıylymdardy da tamashalaýǵa múmkindik paıda bolady. Taǵy bir toqtala ketetin jaǵymdy jańalyq qazaqstandyq televızııa men baspasóz quraldary kórshi elderde kórsetile bastady. Bul ózge memleketterde turatyn qandastarymyz úshin qolǵa alynǵan shara. Kóptegen jyldar boıy júrgizilgen kelissózderdiń nátejıesinde Habar-24 pen Qazaq-TV arnalaryn Reseı Federatsııasynda tirkeýge qol jetkizdik. Reseılik spýtnıktik jáne kabeldik operatorlarymen de kelissózder jaqsy deńgeıge kóterildi. Olar aldaǵy ýaqytta óz «paketterine», ıaǵnı ózderiniń jelileri arqyly bizdiń arnalardy kórsete bastaıdy», - dedi Dáýren Abaev.

Belgili bolǵandaı, osy jyldyń sáýir aıynan bastap, reseıdiń «Mýlt» dep atalatyn balalar kanalynda memlekettik tildegi qazaq ónimderi kórsetile bastady.