Reseıdiń Magnıtogorsk qalasynda qulaǵan úıde mert bolǵandar sany 7 adamǵa jetti
ASTANA. QazAqparat - Reseıdiń Magnıtogorsk qalasynda qulaǵan úıdiń saldarynan mert bolǵandar sany 7 adamǵa jetti. Bul týraly TASS agenttigi habarlady.
Agenttiktiń habarlaýynsha, úıdiń qulaýyna jarylys sebep bolǵan. Aldyn ala málimetter boıynsha, turmysta paıdalanylatyn gaz jarylǵan. Sonyń saldarynan úıdiń podezi qulaǵan. Qazirgi tańda taǵy eki podez qulaýy múmkin degen qaýip bar. 10 qabatty turǵyn úıde barlyǵy 12 podez bar. Onda 1,1 myń adam turyp jatyr.
Reseıdiń Tótenshe jaǵdaılar mınıstrliginiń habarlaýynsha, oqıǵanyń saldarynan mert bolǵandar sany 7 adamǵa jetti. Olardyń máıitteri úıdiń qırandylarynyń astynan alynǵan. Mınıstrliktiń sońǵy málimetteri boıynsha, qulaǵan úıde turyp jatqan jáne osy oqıǵadan zardap shekken taǵy 35 adamnyń taǵdyry beımálim bolyp otyr. Mınıstrlik baılanysqa shyǵa almaı otyrǵan úıdiń turǵyndarynyń tizimin jarııalady. Óz kezeginde Magnıtogorsk qalasynyń ákimshiligi qulaǵan úıdiń 45 turǵynynyń tizimin jarııalady. Olarmen eshqandaı baılanys joq.
Oqıǵa bolǵan aımaqta izdestirý-qutqarý jumystary júrip jatyr. Apattyń saldarymen kúreske 1,3 myń adam jáne 200 tehnıka jumyldyrylǵan. Tótenshe jaǵdaılar mınıstrligi izdestirý-qutqarý jumystarynyń jýyrda bitýi qajettigin aıtty. Alaıda, úskirik aıaz ben úıdiń taǵy da qulaý múmkindigi jaǵdaıdy odan saıyn kúrdelendirip otyr.
Qalada tótenshe jaǵdaı jarııalanyp, keshirek ol búkil Chelıabınsk oblysy boıynsha jarııalandy. RF Tergeý komıteti úıdiń qulaýyna baılanysty qylmystyq is qozǵady.
