Reseıdiń Mádenıet mınıstri 28 panfılovshynyń erligine shúbá keltirgen muraǵat basshysyn «táýbesine» keltirdi

ASTANA. QazAqparat - Reseı muraǵatynyń basshysy qandaı da bir tarıhı qujatty baǵalaýǵa quqyly emes. Óıtkeni, bul múldem bólek mamandyq. Mundaı pikirdi Reseı Mádenıet mınıstri Vladımır Medınskıı bildirdi, dep jazady «Kommersant».

«Reseılik muraǵat basshysy - ol jazýshy da, jýrnalıst te, tarıhı burmalaýshylyqpen kúresýshi de emes. Biz esh ýaqytta da muraǵat jumysyna aralasýǵa tyrysqan joqpyz. Bul ońaı sharýa emes. Sondyqtan ony kásibı mamandarǵa senip tapsyrǵan jón. Degenmen, muraǵat qyzmetkerleri aınalysýy tıisti máseleler de bar», - dedi ol muraǵat isi problemalary qaralǵan jıyn barysynda.

V.Medınskııdiń atap ótýinshe, muraǵat qyzmetkerleri memleket qarjy tólegen ispen ǵana aınalysyp, aralas mamandyqty meńgerýge den qoımaýy tıis. Onyń paıymynsha, memleket reseılik muraǵattardyń basshylaryna aqshany adamdarǵa qujattardy usyný úshin tólep otyr. Al odan keıingi túpkilikti qorytyndy shyǵarý jýrnalısterdiń isi.

«Al eger de basshylardyń biri mamandyǵyn aýystyrýǵa nıet tanytsa, biz ony túsinemiz», - dedi Reseı Mádenıet mınıstri.

Aıta keteıik, osydan biraz ýaqyt buryn Reseı Memlekettik muraǵatynyń dırektory Sergeı Mıronenko Dýbosekovo túbinde 28 panfılovshynyń nemistiń 50 tankisiniń jolyn keskendigi jaıly erligin joqqa shyǵarǵan edi. Sonymen qatar ol saıası jetekshi Vasılıı Klochkovtyń «Sheginer jer joq, Artymyzda Máskeý!» degen sóziniń de oıdan shyǵarylǵandyǵyn aıtqan bolatyn. Onyń sózine qaraǵanda, bul qanatty sózdi «Krasnaıa Zveda» gazetiniń ádebı hatshysy Aleksandr Krıvıtskıı oıdan shyǵarǵan. Dál osy jýrnalıst 28 panfılovshynyń da erligin jazǵan edi.