Reseıdiń Krasnoıarsk qalasynda narkologııalyq klınıka órtenip, 4 adam qaıtys boldy
KRASNOıARSK. NUR-SULTAN. QazAqparat – Reseıdiń Krasnoıarsk qalasyndaǵy jekemenshik narkologııalyq klınıkadaǵy órtten 4 adam qaza taýyp, ekeýi jaraqat aldy, dep habarlaıdy QazAqparat Reseıdiń TASS agenttigine silteme jasap.
17 qyrkúıek kúni saǵat 03:46-da (Máskeý ýaqytymen 23: 46) Krasnoıarskidegi Mır dańǵylynda ornalasqan «Taza qala» jeke narkologııalyq klınıkasynan órt shyqqany týraly aqparat kelip tústi.
«Aldyn ala málimetter boıynsha órt saldarynan 6 adam zardap shegip, tórteýi qaıtys boldy», – dep habarlady Tótenshe jaǵdaılar mınıstrliginen.
Birinshi qabattaǵy kabınette 10 sharshy metr alańda órt shyǵyp, órt sóndirýshiler alty adamdy qutqarǵan. Ǵımaratta adamdardyń bar-joqtyǵyna tekserý júrgizildi, jalyn sóndirildi.
Oqıǵa ornyna evakýatsııalanǵan adamdardy jylytý úshin avtobýs jiberildi. Klınıkadan 16 adam qutqaryldy, 12 adam turǵyn úıdiń kireberisinen evakýatsııalandy, onyń ishinde bir bala bar.
