Reseıdiń Krasnoıarsk qalasynda qoıma órtenip, úsh órt sóndirýshi mert boldy
MÁSKEÝ. TASS – QazAqparat – Reseıdiń Krasnoıarsk óńirindegi avtobólshekter qoımasynda órt kezinde joǵalyp ketken úsh órt sóndirýshi mert boldy, dep habarlaıdy QazAqparat reseılik TASS agenttigine silteme jasap.
«Boljam boıynsha, olardyń ústine shatyr qulap, qaza tapqan», - dedi quqyq qorǵaý organdarynyń ókili.
Sondaı-aq, ol ottegi ballondary 40 mınýtqa eseptelgenin aıtty. Al órt sóndirýshilermen baılanys bir saǵattan asa ýaqyt buryn úzilgen.
Reseılik BAQ buǵan deıin Krasnoıarskidegi avtobólshekter qoımasynda bolǵan órtti sóndirý kezinde úsh órt sóndirýshimen baılanystyń úzilgeni, olardy izdeý jalǵasyp jatqanyn habarlady.
Jedel qyzmet ókiliniń sózinshe, olar tútin basqan ǵımarat ishinde baǵytyn joǵaltyp alǵan tárizdi.
«Boljam boıynsha, qoımada joǵalyp ketken adamdardy izdeýge barǵan gaz-tútinnen qorǵaý qyzmetiniń úsh qyzmetkeri ǵımaratty qatty tútin basyp, eshteńe kórinbeı qalǵandyqtan baǵytyn joǵaltyp alǵan. Sodan keıin olarda ottegi taýsylyp, ǵımarattyń shatyry qulap úsheýi de mert bolǵan», - dedi derekkóz.
TJM kýágerlerdiń sózin negizge ala otyryp, qoımada 1-2 adam bolýy múmkin ekenin aıtty. Olardy izdeý úshin gaz-tútinnen qorǵaý qyzmetiniń bes toby jumyldyrylǵan. Birneshe ýaqyt ótken soń úsh adamnan quralǵan alǵashqy toppen baılanys úzildi.
Reseı TJM bas basqarmasynyń óńirlik basshysy Igor Lısın jýrnalısterge órt sóndirý kúshi men quraldaryn arttyryp jatqanyn málimdedi.
«Qazirgi ýaqytta tilsiz jaýdy aýyzdyqtaýǵa 148 adam men 43 tehnıka jumyldyryldy», -dedi ol.
