Reseıdiń Krasnoıar ólkesinde oq-dáriler qoımasyndaǵy jarylystar toqtady
AChINSK. TASS-QazAqparat – Reseıdiń Krasnoıar ólkesindegi áskerı bólimniń oq-dári qoımasynda jarylystar toqtady, dep habarlaıdy QazAqparat TASS agenttigine silteme jasap.
«Eki saǵat buryn jarylystar estilip jatqan edi, qazir - joq. Jarylystar toqtady», - dep málim etti agenttikke Achınsk qalasy ákimshiliginiń baspasóz qyzmetinen.
Eske salaıyq, 5 tamyz kúni Krasnoıar ólkesiniń Achınsk aýdanynda artıllerııalyq snarıadtarǵa arnalǵan oq-dáriler qoımasynan órt shyqty. Jarylystar saldarynan 11 adam zardap shekti. 20 shaqyrym radıýsta halyqty evakýatsııalaý týraly sheshim qabyldandy. Al Achınsk aýdanynyń aýmaǵynda tótenshe jaǵdaı rejimi engizildi.
