Reseıdiń kórnekti qaıratkerleri «QR Táýelsizdiginiń 25 jyldyǵy» mereıtoılyq medalin aldy
Nagradalardy Reseı Federatsııasyndaǵy QR Tótenshe jáne Ókiletti Elshisi Marat Tájın tapsyrdy.
«16 jeltoqsanda Qazaqstan Táýelsizdiktiń 25 jyldyǵyn atap ótti. Osyǵan baılanysty Memleket basshysy Prezıdent Jarlyǵyna sáıkes reseılik mádenıet, ǵylym, ekonomıka qaıratkerlerin, RF aýmaǵyna baratyn Qazaqstan azamattaryn Qazaqstandy, ekijaqty ekonomıkalyq jáne saıası qatynastardy damytýǵa qosqan úlesi úshin marapattaýdy tapsyrdy», - dedi Elshi.
«QR Táýelsizdiginiń 25 jyldyǵy» mereıtoılyq medalimen M.V. Lomonosov atyndaǵy Máskeý memlekettik ýnıversıtetiniń rektory Vıktor Sadovnıchıı, reseı taýar óndirýshileri odaǵynyń prezıdenti Oleg Soskovets, kórnekti memlekettik jáne qoǵam qaıratkeri Taıyr Mansurov marapattaldy.
«25 jylda Qazaqstan tańqalarlyq nátıjege qol jetkizdi. Álemdik qoǵamdastyqta Prezıdent bedeldi jáne yqpaldy saıasatker retinde tanyldy», - dedi T. Mansurov.
