Reseıdiń kólik zaýyttary satylymnyń azaıýy saldarynan óndirisin qysqartýda
ASTANA. QazAqparat - Ótken aptada Reseıdiń birneshe kólik shyǵarýshy kompanııasy zaýyttarynyń jumys ýaqytyn qysqartý jospary týraly jarııalady. Buǵan kompanııalarda aqpan aıynda kólikter satylymynyń azaıýy sebep boldy, dep jazady RBK.
Avtomobılder satylymynyń kúrt azaıýy saldarynan Reseıdegi birneshe kólik zaýyty shyǵarý kólemderin tómendetýde. Vsevolojsk qalasyndaǵy Ford zaýyty qysqartylǵan jumys aptasyna ótpekshi. Peterbýrgtegi Nissan zaýyty óndirisin eki aptaǵa toqtatpaq. Volkswagen Group Rus Tómengi Novgorodtaǵy Gorkıı kólik zaýytyndaǵy Volkswagen jáne Skoda avtokólikterin shyǵarý óndirisiniń kólemin qysqartyp otyr.
Vsevolojskidegi Ford zaýytynyń 25 mamyrdan bastap jumystyń úsh kúndik merzimine ótýi múmkin ekeni týraly kásiporyn kásipodaǵyndaǵy derekkózi habarlady. Aımaqaralyq kásipodaqtyń jumys qaýymdastyǵynyń esimi atalmaǵan ókiline silteme jasaǵan «Vedomostı» gazeti Peterbýrgtegi Nissan zaýytynyń dúısenbiden bastap 16-31 naýryz aralyǵynda demalysqa ketý arqyly óndirisin toqtatýy múmkin dep habarlady. Kompanııanyń ókili májbúrli demalystyń merzimin rastamasa da, aqpan aıynan bastap zaýyttyń azaıtylǵan óndiriske ótkenin, soǵan baılanysty jumystyń toqtaýy múmkin ekenin atap ótken. Nissan basshylyǵy kúrdeli ekonomıkalyq jaǵdaı men suranystyń kúrt azaıýyna nazar aýdaryp otyr.
Volkswagen toby 2015 jyldan bastap Kalýgadaǵy zaýytynda Audi kóliginiń úsh modeli: Q5 jáne Q7 krossoverlerin, sondaı-aq A7 hetchbegin jınaýdy toqtatty, dep habarlady «Vedomostı» gazetine toptyń ókili. Naýryz aıynan bastap Tómengi Novgorodtaǵy Volkswagen jáne Skoda avtomobılderiniń óndirisi tórt kúndik jumys aptasyna aýystyryldy. Bul týraly kompanııanyń jurtshylyqpen baılanys boıynsha dırektory Natalıa Kostıýkovıch habarlaǵan.
Qysqartýlarǵa dılerler de daıyndalýda. Ótken beısenbide «Reseıdegi avtomobıl dılerleri» qaýymdastyǵynyń prezıdenti Vladımır Mojenkov aǵymdaǵy jyly Reseıdegi kólik satylymdary 1,5 mln. avtomobılge deıin qysqarýy yqtımal ekenin málimdedi.
