Reseıdiń Kemerovo qalasynda saýda úıinde bolǵan órtten 37 adam qaza tapty
ASTANA. QazAqparat - Tergeý komıteti Reseıdiń Kemerovo qalasyndaǵy «Zımnıaıa vıshnıa» saýda úıinen shyqqan órtten 37 adam ajal qushqanyn naqtylady, dep habarlaıdy TASS.
«Qazirgi ýaqytta Kemerovo qalasyndaǵy saýda úıinde bolǵan órtten 37 adamnyń qaza tapqany naqtylandy» dep habarlaıdy vedomstvo telegram-kanalda.
Úıindini arshý jumystary áli de jalǵasyp jatyr.
Buǵan deıin órt sóndirý jedel shtaby da 37 adamnyń ajal qushqanyn málim etken bolatyn. Odan bólek taǵy 43 adam japa shekken.
Órt saýda úıiniń sońǵy 4-qabatynan shyqqan. Ǵımarattan 20 adam qutqaryldy, taǵy 100 adam qaýipsiz jerge shyǵaryldy.
Sońǵy málimet boıynsha, tilsiz jaý aýyzdyqtalǵan. Órt 1,5 myń sharshy metr aýmaqty sharpyǵan.
Foto: © Danıl Aıkın/TASS
