Reseıdiń qazaq jastary Dúnıejúzilik qazaqtar quryltaıynda sporttyq baǵdarlamalarǵa qatysady
ALMATY. Tamyzdyń 23-i. QazAqparat /Názıra Eleýhan/- IV-shi Dúnıejúzilik qazaqtar quryltaıy aldynda Reseıdiń Saratov oblysy Marks qalasynda tamyzdyń 13-14 aralyǵynda fýtboldan irikteý jarystary ótti. Bul týraly búgin Dúnıejúzilik qazaqtar qaýymdastyǵy Saraptama ortalyǵynyń dırektory Kúlǵazıra Baltabaeva aıtty,
dep habarlaıdy QazAqparat.
"Joldastyq kezdesýlerge Máskeýdiń, Novosibirdiń, Omby men Samara jáne Saratov oblystarynyń komandalary qatysty. Ombydan Sibirdiń "Móldir" qazaq mádenı ortalyǵynyń jetekshisi, Qazaqstannyń eńbek sińirgen qaıratkeri Altynaı Júnisovanyń jetekshiligimen 19 fýtbolshy tamyzdyń aptabynda avtobýspen 36 saǵattan astam jol júrip keldi. Soǵan qaramastan, myqtylyqtaryn kórsetip, jeńis tuǵyrynan kórinip birinshi oryndy ıelendi. Ekinshi oryndy Saratov oblysynyń qurama komandasy aldy, al úshinshi orynǵa Máskeý jáne Novosibirdiń birikken quramasy ıe boldy. Sondaı-aq, medaldar men maqtaý qaǵazdary saltanatty jaǵdaıda "Eń úzdik qorǵaýshy", "Eń úzik shabýylshy" atalymdary boıynsha da tabys etildi", dedi Kúlǵazıra Baltabaeva.
Onyń aıtýynsha, mundaı shara Reseı aýqymynda birinshi ret ótkizilgen. "Jarystyń barlyq uıymdastyrý jáne qarjylyq qoldaýyn "Rýhanı jańǵyrý" qory óz moınyna aldy. Ony Saratov oblysynyń qoǵam qaıratkeri, tanymal kásipker, fermer Beısembaı Sharlapov basqarady", dedi ol.
Quryltaıda reseılik qazaqtardyń qarsylastary Batys Eýropanyń eki komandasy, Sondaı-aq, Ózbekstan, Mońǵolııa, Qytaı, Túrkııanyń komandalary bolmaq.
Jarystyń maqsaty - Astana qalasynda ótetin quryltaıdyń sporttyq baǵdarlamasyna qatysýshy retinde reseılik qazaqtar atynan qurama komanda jasaqtaý. Buǵan deıin habarlanǵandaı, quryltaı bıylǵy jyldyń kúzine josparlanǵan.
