Reseıdiń Kalınıngrad qalasymen áýe qatynasy qaıta jandandy

NUR-SULTAN. QazAqparat - Qazaqstan aýmaǵynda koronavırýs ınfektsııasynyń paıda bolýy men taralýyna jol bermeý jónindegi vedomstvoaralyq komıssııa Nur-Sultan – Kalınıngrad jáne Almaty – Kalınıngrad baǵyttary boıynsha ár baǵytta aptasyna 1 reısten ashýǵa ruqsat berdi.

Bul týraly QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap habarlaıdy.

Boeing-737 áýe kemesimen turaqty reısterdi 2021 jylǵy 4 qarashadan bastap Reseıdiń «Severnyı veter» áýe kompanııasy júzege asyrmaq. Atap aıtqanda, Nur-Sultan – Kalınıngrad baǵytynda senbi kúnderi, Almaty – Kalınıngrad baǵytynda beısenbi kúnderi ushady.

Reıster áýe kompanııasynyń saıtynda jarııalanǵan kestege sáıkes sanıtarlyq – epıdemıologııalyq talaptardy qatań saqtaı otyryp oryndalady.