Reseıdiń iri kompanııalarynyń aktsııalaryn endi qazaqstandyqtar satyp ala alady
ALMATY. QazAqparat - Reseıdiń iri kompanııalarynyń aktsııalary endi KASE qor bırjasyna shyǵarylady. Bul týraly búgin Almatyda ótken baspasóz máslıhaty barysynda belgili boldy.
«Frıdom Fınans» AQ reseılik 7 iri kompanııanyń aktsııalaryn lıstıngke shyǵarýǵa ruqsat aldy. Qazaqstan qor bırjasy kompanııaǵa atalǵan qundy qaǵazdar jónindegi market-meıker mártebesin berdi.
Budan bylaı Qazaqstan qor bırjasynda júrgiziletin saýda-sattyq arqyly «Aeroflot-rossııskıe avıalınıı» JAQ (jarııa aktsıonerlik qoǵamy), «Bank BVT» JAQ, «Gazprom» JAQ, «Magnıt» JAQ, «Rostelekom» JAQ, «Sberbank Rossıı» JAQ, «Ýralkalıı» JAQ syndy kompanııalardyń qundy qaǵazdaryn satyp alýǵa nemese satýǵa bolady.
«Biz bul qadamǵa Qazaqstanyń qarjy naryǵyn damytý jáne Biryńǵaı ekonomıkalyq keńistik sheńberinde Reseımen yqpaldastyqty arttyrý maqsatynda bardyq. Tarıhqa úńilsek, geografııalyq jaqyndyǵy men orys tilindegi málimetterdiń qoljetimdiligine baılanysty qazaqstandyq ınvestorlar qaı kezde Reseıdiń qundy qaǵazdaryna qyzyǵýshylyq tanytyp otyrǵan. Endi biz KASE qorynda jumys isteıtin barlyq ınvestorlarǵa Reseı qor naryǵyndaǵy «kógildir fıshkalarǵa» qol jetkizýge, sondaı-aq, teńgeleı eseptesýge, jergilikti brokerlik kompanııalar arqyly jáne Qazaqstandaǵy salyqtyq jeńildikterdi paıdalanýǵa múmkindik berip otyrmyz. Shetelderdegi tanymal bırja quralynyń engizilýi aımaqtyq qarjy habyn damytýǵa jasalǵan úlken de mańyzdy qadam dep bilemin», - dedi «Frıdom Fınans» IK Bas dırektory Tımýr Týrlov.
Óz kezeginde «Qazaqstan qor bırjasy» AQ ókilderi Reseıdiń «kógildir fıshkalarynyń» Qazaqstan qor naryǵyna shyǵarylýy otandyq naryqtyń ótimdiligin arttyratynyna senim bildirdi.
«Nátıjesinde, ol tabysty ári senimdi ınvestıtsııa quralyn izdep júrgen ınvestorlar men bırja naryǵyn kapıtal tartý alańy retinde qarastyratyn kompanııalar úshin tartymdy bolady dep senemiz. Biz burynǵysha, jańa kompanııalardyń qundy qaǵazdaryn lıstıngke shyǵarýǵa jáne KASE qory usynatyn qarjylyq quraldar sanyn arttyrýǵa múddelimiz. Ol úshin barynsha qolaıly jaǵdaı jasaýǵa daıynbyz. Máselen, qazirgi tańda ózge bırjalarda lıstıngke shyǵarylǵan sheteldik kompanııalardyń naryqqa shyǵý kezeńi barynsha jeńildetilgen», - dedi «Qazaqstan qor bırjasy» AQ Basqarma tóraǵasynyń orynbasary Horoshevskaıa Natalıa.
Reseı qundy qaǵazdarynyń baǵasy Máskeý bırjasyndaǵy baǵaǵa sáıkes belgilenedi. Sodan soń belgilengen baǵa aǵymdaǵy baǵam negizinde teńgemen eseptelip, market-meıkerler osy baǵa negizinde jumys isteıdi. Aktsııalar Astana ýaqytymen saǵat 15:00-den 17:00-ge deıin saýdalanady.
Aktsııalardy kez-kelgen adam qalaýynsha satyp ala alady. Eń tómengi lot bir qundy qaǵazǵa teń. Jospar boıynsha saýda-sattyq 2016 jyldyń 15-sáýirinde bastalýy tıis.
Qazirgi tańda «Frıdom Fınans» kompanııasy reseılik taǵy 6 iri kompanııanyń qundy qaǵazdaryn lıstıngke shyǵarýǵa daıyndap jatyr. Olardyń arasynda «GMK «Norılskıı nıkel» JAQ, «Lýkoıl» JAQ, «Novolıpetskıı metallýrgıcheskıı kombınat» JAQ, «Rosneft» AAQ, «Severstal» JAQ, «Sýrgýtneftegaz» AAQ bar.
Aıta keteıik, Máskeý bırjasy boıynsha Aeroflot-rossııskıe avıalınıı» JAQ aktsııasynyń baǵasy 75 rýbl, «Bank VTB» JAQ - 0,07 rýlb, «Gazprom» JAQ 147 rýbl, «Magnıt» JAQ - 10 470 rýbl, «Rostelekom» JAQ - 98 rýbl, «Sberbank Rossıı» JAQ - 109 rýlb, «Ýralkalıı» JAQ bir aktsııasynyń quny 164 rýlb.
myń bar shygar
