Reseıdiń Halyq ártisi Tatıana Samoılova aýyr halde aýrýhanaǵa tústi
ASTANA. QazAqparat - Mıllıondaǵan kórermenderge «Letıat jýravlı» kınofılmi arqyly jaqsy tanys Tatıana Samoılova shuǵyl túrde aýrýhanaǵa jatqyzyldy.
80 jasqa tolǵan Reseıdiń Halyq ártisi Tatıana Samoılovanyń densaýlyǵy kúrt nasharlap ketken sebepti ol Máskeýdegi emhanalardyń birine jetkizilgen, dep jazady segodnya.ua. Atap aıtqanda, halyqtyń súıikti aktrısasynyń qan qysymy kúrt kóterilip, júrek syrqaty syr bergen. Qazirgi ýaqytta ol jasandy tynys aldyrý apparatyna jalǵanyp, ómiri úshin kúresip jatyr. Dárigerler onyń jaǵdaıyn aýyr dep baǵalap otyr. Esterińizge sala keteıik, Tatıana Samoılova Veronıka rólin somdaǵan «Letıat jýravlı» fılmi 1958 jyly Kann kınofestıvalinde Keńes Odaǵy boıynsha júlde alǵan jalǵyz týyndy boldy. Al Tatıananyń ózi bolsa osy eńbegi úshin qazylar alqasynyń arnaıy júldesine ıe bolǵan edi.
