Reseıdiń Esil qalasynda Abaı atyndaǵy qazaq tili synyby ashylady
«Reseıde, ásirese Túmen oblysynda turyp jatqan qazaqtar úshin Abaı shyǵarmalary men murasy óte mańyzdy. Túmendik jastar úlkenderge, eńbekke qurmet kórsetý, otbasy men dástúrge qamqorlyqpen qaraý baǵytynda tálim-tárbıe alyp jatyr. Buǵan qosa, Abaıdyń uly – Áddirahmannyń 1886-1889 jyldary Túmendegi Aleksandrovsk ýchılışesinde bilim alýynyń da bizder úshin mańyzy óte joǵary. Ol Túmenge 18 jasynda kelgen. Tipti Abaıdyń ózi de qalamyzǵa, balasyna kelip-ketýi múmkin. Qazir muraǵat materıaldaryn zerdelep jatyrmyz», - dedi Reseıdiń Túmen oblystyq qazaqtardyń ulttyq-mádenı avtonomııasynyń tóraǵasy Esenǵalı Ibraev.
Onyń atap ótýinshe, bıyl Túmen oblystyq qazaqtardyń ulttyq-mádenı avtonomııasy ótkizetin barlyq iri sharalar Abaıdyń 175 jyldyq mereıtoıyna arnalatyn bolady.
«Túmen oblysynda Abaıdyń 175 jyldyq mereıtoıy aıasynda qazaq mádenı kúnderi, Túmen oblysy qazaqtarynyń quryltaıy, qazaq shyǵarmashylyǵyna arnalǵan «Jas urpaq» ІІ oblystyq balalar festıval-konkýrsy ótkiziledi. Sonymen qatar uly aqynnyń shyǵarmalary men murasyn nasıhattaýǵa arnalǵan «Abaı oqýlary» uıymdastyrylady. Al 2020 jyldyń 21 aqpanynda, Halyqaralyq ana tili kúninde Abaıdyń 175 jyldyq mereıtoıynyń qurmetine oraı Túmen oblysynyń Esil qalasynda qazaq tilin oqytatyn synyp ashýdy josparlap otyrmyz. Synyp qazaqtyń uly aqyny ári aǵartýshysy Abaı esimimen atalatyn bolady», - dedi E. Ibraev.
Ol Túmen oblystyq qazaqtardyń ulttyq-mádenı avtonomııasy óńirde buǵan deıin de oqýshylar men jastarǵa ana tilderin oqytatyn synyptardy uıymdastyrǵandyǵyn aıtty.
«Bul Túmen oblysynda ashylǵan tórtinshi synyp bolmaq. Synyptar Túmen oblystyq qazaqtardyń ulttyq-mádenı avtonomııasy bastamasymen jáne Túmen oblystyq úkimetiniń, jergilikti atqarýshy organdardyń qoldaýymen qurylyp jatyr. Aldaǵy mindet - balalardy ana tilderinde sóıleýge jáne jazýǵa ǵana úıretip qoımaı, týǵan halqynyń, onyń uly tulǵalarynyń tarıhymen tanystyrý», - dedi E.Ibraev.
